სასამართლომ ლაზარე გრიგორიადისი პატიმრობაში დატოვა

თბილისი, 1 მაისი – Sputnik. თბილისის საქალაქო სასამართლომ 7-9 მარტის საპროტესტო აქციების დროს პოლიციელის ჯანმრთელობის ხელყოფისა და სახელმწიფო ქონების განადგურების მუხლებით ბრალდებული ლაზარე გრიგორიადსის მიმართ აღკვეთის ღონისძიების სახით პატიმრობა ძალაში დატოვა, იუწყება „პირველი არხი“.

მოსამართლემ არ დააკმაყოფილა დაცვის მხარის შუამდგომლობა 20 ათასი ლარის გირაოს შეფარდების შესახებ.

ბრალდებულმა სასამართლოზე განაცხადა, რომ მიმალვას არ აპირებს.

სასამართლო სხდომის პარალელურად, ლაზარე გრიგორიადისის გათავისუფლების მოთხოვნით გაიმართა საპროტესტო აქცია, რომელშიც აქტივისტები და პოლიტიკოსები მონაწილეობდნენ. დაკავების შემდეგ მას არაერთმა ოპოზიციურმა პარტიამ მხარდაჭერა და სოლიდარობა გამოუცხადა. ისინი აცხადებენ, რომ მთავრობას გრიგორიადსის სამაგალითოდ დასჯა სურს.

სასამართლომ გრიგორიადისს პატიმრობა 31 მარტს შეუფარდა, თუმცა ადვოკატები 10 ათასი ლარის ოდენობის გირაოს შეფარდების შუამდგომლობით გამოვიდნენ, სასამართლომ კი შუამდგომლობა არ გაიზიარა.

გრიგორიადისის საქმეზე გამოძიებამ დაადგინა, რომ 7 მარტს, დაახლოებით 23:15 საათზე რუსთაველის გამზირზე მან ორჯერ ესროლა ე.წ. მოლოტოვის კოქტეილი შსს-ს განსაკუთრებულ დავალებათა დეპარტამენტის თანამშრომლებს, რომლებიც 9 აპრილის ქუჩაზე პროფესიულ მოვალეობებს ასრულებდნენ.

მისი ქმედებების შედეგად დეპარტამენტის ორმა თანამშრომელმა დამწვრობები მიიღო - მათ სტაციონარული მკურნალობა დასჭირდათ.

გარდა ამისა, გამოძიებამ დაადგინა, რომ 9 მარტის ღამით გრიგოლიადისმა განზრახ დაწვა ჭანტურიას ქუჩაზე მდგარი შსს-ს კუთვნილი ავტომობილი. ამის შედეგად სახელმწიფო ბიუჯეტისთვის მიყენებულმა ზარალმა 39,5 ათასი ლარი შეადგინა.

დაკავებულს პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე 7-დან 11 წლამდე თავისუფლების აღკვეთა ემუქრება.

7-9 მარტს თბილისში საპროტესტო აქციები გაიმართა. საქართველოში მრავალათასიანი პროტესტი პარლამენტში უცხოური აგენტების შესახებ კანონის პირველი მოსმენით მიღებისთანავე დაიწყო, რაც არაერთხელ გადაიზარდა პოლიციასთან დაპირისპირებაში. აქციის მონაწილეების ნაწილი აგრესიულად იქცეოდა. მათ სპეცრაზმელებს ე.წ. მოლოტოვის კოქტეილები, ქვები და სხვადასხვა საგნები დაუშინეს. შედეგად დაშავდა 58 პოლიციელი. საპასუხოდ პოლიციამ ცრემლსადენი გაზი და წყლის ჭავლი გამოიყენა.

გრიგორიადისის გარდა, ამ დროისათვის აქციებზე პოლიციელებზე თავდასხმის საქმეზე კიდევ ერთი ადამიანია ბრალდებული, რომელიც გირაოს სანაცვლოდ არის გათავისუფლებული.