თბილისი, 20 აპრილი – Sputnik. კორონავირუსის საწინააღმდეგო ორმაგი (ბივალენტური) ვაქცინა საქართველოში, სავარაუდოდ, 2023 წლის შემოდგომისთვის გამოჩნდება, განაცხადა იმუნიზაციის ტექნიკურ მრჩეველთა ეროვნული ჯგუფის ხელმძღვანელმა, იაშვილის სახელობის ბავშვთა ცენტრალური საავადმყოფოს სამედიცინო დირექტორმა ივანე ჩხაიძემ.
ბივალენტურ ვაქცინაში არის ორი ტიპის ანტიგენი. ის მუშაობს როგორც კოვიდის თავდაპირველი ვარიანტის (უჰანის) წინააღმდეგ, ასევე ომიკრონის ახალი ვარიანტის წინააღმდეგ. ჩხაიძის თქმით, კორონავირუსის საწინააღმდეგო ვაქცინა, ისევე, როგორც გრიპის ვაქცინა, საქართველოში წელიწადში ერთხელ იქნება ხელმისაწვდომი რისკ-ჯგუფის პაციენტებისთვის.
„ყველაზე მნიშვნელოვანი იქნება 2023-2024 წლის ზამთრის სეზონისთვის მზადება, სადაც დადგება საკითხი, რისკის ჯგუფებისთვის გრიპთან ერთად რომელი ვაქცინა უნდა შეარჩიოს ქვეყანამ. ბივალენტური ვაქცინის ერთი კომპონენტი თავდაპირველი შტამის წინააღმდეგ მოქმედებს, მეორე კი "ომიკრონის“, – განაცხადა ივანე ჩხაიძემ.
ბოლო მონაცემებით, საქართველოში ბოლო სამი წლის განმავლობაში კორონავირუსით ინფიცირებულთა რაოდენობამ 1.825 ათასს მიაღწია, აქედან 16.965 ადამიანი გარდაიცვალა.
2023 წლის 1 იანვრიდან საქართველოში ინფიცირებულთა რაოდენობა დღეში 200-დან 500-მდე მერყეობს. მარტში ინფიცირებულთა მაქსიმალური რაოდენობა დღეში 450 ადამიანი იყო, მინიმალური კი 200-300.
დაავადებათა კონტროლისა და საზოგადოებრივი ჯანმრთელობის ეროვნული ცენტრის მონაცემებით, ბოლო კვირების განმავლობაში ლაბორატორიულად დადასტურებული ინფექციების 2-5%-ს კორონავირუსი შეადგენს.
ამერიკული კომპანია Moderna-ს გაუმჯობესებული ბივალენტური ვაქცინის შემქმნელები აცხადებენ, რომ ის იძლევა დამატებით დაცვას ვირუსის სხვადასხვა შტამებისგან. უპირველეს ყოვლისა, აცრიან რისკის ქვეშ მყოფ პირებს და ყველას, ვინც 50 წელს არის გადაცილებული.
საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა.