თბილისი, 13 მარტი — Sputnik. ბათუმში მომხდარი უბედური შემთხვევის ფაქტზე, რა დროსაც ბატუტის გადაბრუნების შედეგად ბავშვი გარდაიცვალა, სამართალდამცველებმა 65 წლის მამაკაცი დააკავეს, ნათქვამია საქართველოს შინაგან საქმეთა სამინისტროს მიერ გავრცელებულ განცხადებაში.
უბედური შემთხვევა ბათუმის ბულვარში გუშინ მოხდა. ძლიერმა ქარმა ბათუმის ბულვარში მდებარე ბატუტი აიტაცა, რა დროსაც კონსტრუქციაზე მყოფი ორი მცირეწლოვანი დაშავდა. ერთ-ერთი მათგანი, 9 წლის ბავშვი მიღებული დაზიანებების შედეგად გარდაიცვალა. მომხდარის გამო დაშავდა კიდევ ერთი მოქალაქე.
შსს-ს ცნობით, ბრალდებული პასუხისმგებელი იყო ბულვარში განთავსებული ბატუტის უსაფრთხოებასა და ექსპლუატაციის წესების დაცვაზე, თუმცა მან დაკისრებული ვალდებულებების შესრულება ვერ უზრუნველყო.
გამოძიება საქართველოს სსკ-ის 240-ე მუხლით მიმდინარეობს, რაც გულისხმობს უსაფრთხოების წესის დარღვევას, რამაც ადამიანის სიცოცხლის მოსპობა გამოიწვია.