თბილისი, 5 მარტი – Sputnik. საქართველოს ეროვნულმა ბანკმა ორი წლის განმავლობაში სხვადასხვა წესებისა და დირექტივების დარღვევისთვის დააჯარიმა 181 საფინანსო ორგანიზაცია, მათ შორის 11 კომერციული ბანკი.
საქართველოს ეროვნული ბანკი თავისი უფლებამოსილების ფარგლებში უდგენს მუშაობის წესებს საფინანსო ორგანიზაციებს, აკონტროლებს ფულის გათეთრების შესახებ კანონებისა და დადგენილი წესების დაცვას.
2021 წლიდან სულ დაჯარიმებულია 181 საზედამხედველო სუბიექტი:
კომერციული ბანკი - 11
საგადახდო მომსახურების პროვაიდერი - 12
საბროკერო კომპანია - 5
მიკროსაფინანსო ორგანიზაცია - 32
ფასიანი ქაღალდების რეგისტრატორი - 3
სესხის გამცემი სუბიექტი - 6
ვალუტის გადამცვლელი პუნქტი - 112.
დაჯარიმებულ ბანკებს შორის არიან TBC Bank და Liberty Bank, ასევე Credo Bank და Cartu Bank, რომელიც მმართველი პარტია „ქართული ოცნება - დემოკრატიული საქართველოს“ დამფუძნებელთან, ბიძინა ივანიშვილთან ასოცირდება.
„თიბისი ბანკს“ 928 ათასი ლარის ოდენობის ჯარიმის გადახდა მოუწია მოთხოვნილი ინფორმაციის/დოკუმენტაციის საქართველოს ეროვნული ბანკისთვის არასწორად წარმოდგენის, „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონის“ და „კომერციული ბანკების მიერ ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის შესახებ დებულების დამტკიცების თაობაზე" მოთხოვნების დარღვევის გამო.
„ლიბერთი ბანკმა“ 149,5 ათასი ლარის ოდენობის ჯარიმის გადახდა მოუწია ინფორმაციის მიღების, სისტემატიზაციის, დამუშავებისა და საქართველოს ფინანსური მონიტორინგის სამსახურისათვის გადაცემის წესის ხუთი დარღვევის გამო, ასევე სამი კლიენტის შემთხვევაში „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ" კანონის მოთხოვნების დარღვევის გამო, აგრეთვე ეროვნული ბანკისთვის ინფორმაციის მიწოდების ვადების დარღვევის, საბანკო შემოწმებისა და სხვა წესების დარღვევისთვის.
„კრედო ბანკის“ და „ქართუ ბანკის“ შემთხვევაშიც საუბარია ზემოაღნიშნული წესების დარღვევებზე. ამასთან „კრედო ბანკი“ დაჯარიმდა 44 ათასი ლარით, ხოლო „ქართუ ბანკი“ – 64 ათასი ლარით.
წყარო - ეროვნული ბანკი