თბილისი, 16 იანვარი – Sputnik. რუსეთისა და თურქეთის პრეზიდენტებმა ვლადიმირ პუტინმა და რეჯეფ თაიფ ერდოღანმა სატელეფონო საუბრის დროს უკრაინაში არსებული ვითარება, თურქეთ-სირიის ურთიერთობის მოწესრიგებისა და ენერგეტიკის სფეროში თანამშრომლობის საკითხები მიმოიხილეს.
მხარეებმა რუსული ბუნებრივი აირის მიწოდების საკითხები და თურქეთში გაზის რეგიონული ჰაბის შექმნა განიხილეს. თურქული მხარის ინიციატივით და ანკარაში ადამიანის უფლებათა საკითხებში რუსეთისა და უკრაინის წარმომადგენლების ამასწინანდელი კონტაქტების გათვალისწინებით, წამოიჭრა ტყვეთა გაცვლის საკითხი, პირველ რიგში საუბარი შეეხო დაჭრილ ტყვეებს, იუწყება კრემლის პრეს-სამსახური.
პუტინმა ყურადღება გაამახვილა კიევის დესტრუქციულ ხაზზე, რომელმაც ფსონი დადო საბრძოლო მოქმედებების გააქტიურებაზე დასავლელი სპონსორების დახმარებით, რომლებიც ზრდიან იარაღისა და სამხედრო ტექნიკის მიწოდებას.
„კიევის თვალთმაქცური პოლიტიკის მაგალითია იმ წინადადების მიუღებლობა, რომელიც მართლმადიდებლური შობის დღესასწაულზე ცეცხლის შეწყვეტას ეხებოდა“, – განაცხადა რუსეთის პრეზიდენტმა.
პუტინმა და ერდოღანმა განიხილეს ასევე 2022 წლის 22 ივლისის სტამბულის შეთანხმების რეალიზაციის საკითხი, რომელიც ეხება შავი ზღვის ნავსადგურებიდან უკრაინული ხორბლის გატანას და რუსეთიდან სურსათისა და სასუქების გატანის განახლებას.
გარდა ამისა, განიხილეს თურქეთ-სირიის ურთიერთობის მოწესრიგების საკითხები, მათ შორის, რუსეთის, თურქეთისა და სირიის წარმომადგენელთა მონაწილეობით კონსულტაციების დაწყების შესახებ ანკარის ინიციატივის კონტექსტში. აღინიშნა რუსეთის, თურქეთისა და ირანის ერთობლივი მუშაობის პრაქტიკული მნიშვნელობა სირიაში ვითარების დარეგულირების საკითხებში ასტანის პროცესის ფარგლებში.