თბილისი, 26 დეკემბერი — Sputnik. ინდოეთი ჩინეთთან და პაკისტანთან საზღვრებზე კვაზიბალისტიკურ რაკეტებს განათავსებს, იუწყება სააგენტო Ani.
როგორც სააგენტოს თავდაცვის სამინისტროში არსებულმა წყარომ აცნობა, უწყებამ „ხმელეთი-ხმელეთის“ ტიპის რაკეტა Pralay-ს შეძენის ნებართვა უკვე გასცა.
„თავდაცვის სამინისტროში გამართულ მაღალი დონის თათბირზე დაახლოებით 120 რაკეტის შეძენა გადაწყდა საზღვრების გასწვრივ განსათავსებლად“, — განაცხადა წყარომ.
გავრცელებული ინფორმაციით, Pralay-ს სამიზნის განადგურება 150-დან 500 კმ-მდე რადიუსში შეუძლია, ამასთან აქვს 350-700 კგ-იანი ქობინი და ფრენის ტრაექტორიის შეცვლა შეუძლია, რაც მის ჩაჭერა-განადგურებას აძნელებს.
ამასთან ცნობილი ხდება, რომ ამ დროისათვის მიმდინარეობს მუშაობა რაკეტის სრულყოფაზე, რის შემდეგაც მისი მოქმედების რადიუსი მნიშვნელოვნად გაიზრდება.
მანამდე, დეკემბერში ინდოეთისა და ჩინეთის საზღვარზე ორი ქვეყნის სამხედროების შეტაკება მოხდა, რაც პირველი შემთხვევა იყო 2020 წლის მაისის შემდეგ. პენტაგონის განცხადებით, ჩინეთი ინდოეთთან საზღვრისპირა რაიონებში „ძალების თავმოყრასა და სამხედრო ინფრასტრუქტურის შექმნას განაგრძობს“, რის პასუხადაც ინდოეთმა საზღვარზე რეკორდული რაოდენობის ძალები განათავსა.
წყარო: Ani