თბილისი, 19 დეკემბერი – Sputnik. მშპ-ის ორნიშნა ზრდა საქართველოს მთავრობისთვის მნიშვნელოვანია დაგეგმილი პროექტების რეალიზაციისთვის, მათ შორის, სახელმწიფო ბიუჯეტის შესრულებისთვის, განაცხადა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის შემდეგ გამართულ ბრიფინგზე.
საქართველოს ეკონომიკის აღდგენა სწრაფი ტემპით მიმდინარეობს – მშპ-ის რეალურმა ზრდამ 2022 წლის ოქტომბერში 8,3% შეადგინა 2021 წლის ანალოგიურ პერიოდთან შედარებით. რეალური ზრდის საშუალო მაჩვენებელმა ათ თვეში 10% შეადგინა.
„ჩვენთვის, იცით, როგორი მნიშვნელოვანია ყველა პროექტის რეალიზება, რომელიც დაგეგმილია, ბიუჯეტისა და ვალდებულებების შესრულება, რომლებიც სახელმწიფომ მოსახლეობის წინაშე აიღო, ამიტომ განსაკუთრებულ ყურადღებას ვუთმობთ ეკონომიკურ ზრდას“ , – აღნიშნა დავითაშვილმა.
მინისტრის ინფორმაციით, საქართველოს სტატისტიკის ეროვნულმა სამსახურმა „საქსტატმა“ დააზუსტა მესამე კვარტალში მშპ-ის ზრდის მონაცემები.
„მესამე კვარტალში ეკონომიკის ზრდა 0,1 საპროცენტო პუნქტით მეტი იყო წინასწარ მონაცემებთან შედარებით, რომლებიც საზოგადოებრიობას წარუდგინეს. ასე რომ, მიმდინარე ზრდა 2022 წელს საბოლოო ჯამში ორნიშნა მაჩვენებლით გამოიხატება – მშპ-ის ზრდა 2022 წელს 10%-ს შეადგენს“, – აღნიშნა მინისტრმა.
დავითაშვილის თქმით, ამჟამინდელი მონაცემები იძლევა ვარაუდის საფუძველს, რომ ქვეყანა მიმდინარე წელს შარშანდელის მსგავსად ორნიშნა ეკონომიკური ზრდით დაასრულებს.
„ჩვენი მოლოდინი საკმაოდ პოზიტიური უნდა იყოს მომავალ წელსაც, მიმდინარე ეკონომიკური ტენდენციების გათვალისწინებით“, – განაცხადა დავითაშვილმა.
დავითაშვილმა სავაჭრო ბრუნვის, კერძოდ, ექსპორტის ზრდას მნიშვნელოვანი ფაქტორი უწოდა, რომელიც საქართველოს ეკონომიკურ ზრდაზე მოქმედებს.
„დღეს ჩვენი სავაჭრო ბრუნვა რეკორდულია. გაიზარდა როგორც ექსპორტი, ისე იმპორტი და 17 მილიარდ დოლარს გადააჭარბა. განსაკუთრებით აღსანიშნავია ექსპორტის ზრდა, რომელიც მნიშვნელოვან როლს ასრულებს ეკონომიკურ ზრდაში. ექსპორტი საქართველოდან ნოემბერში დაახლოებით 301 მილიონი დოლარით გაიზარდა“, – განაცხადა მინისტრმა.
„საქსტატის“ მონაცემებით, საქართველოს საგარეო სავაჭრო ბრუნვა 2022 წლის იანვარ-ნოემბერში 32,2%-ით გაიზარდა გასული წლის იმავე მაჩვენებელთან შედარებით და 17 მილიარდი დოლარი შეადგინა. საანგარიშო პერიოდში საქართველოდან 5 მილიარდ დოლარზე მეტი ღირებულების პროდუქცია გავიდა – შარშანდელთან შედარებით თითქმის 32%-ით მეტი.