თბილისი, 18 ნოემბერი — Sputnik. საწარმო „რუსთავის აზოტის“ ტერიტორიაზე ხარაჩოს ჩამონგრევის შედეგად დაშავებული ორი მამაკაცის ჯანმრთელობის მდგომარეობა სტაბილურია, იუწყება ტელეკომპანია „რუსთავი 2“.
ქარხნის ტერიტორიაზე უბედური შემთხვევა დღეს, დილით მოხდა. შემთხვევის შედეგად ერთი ადამიანი დაიღუპა, ორი კი დაშავდა. ამ დროისათვის დაშავებულები რუსთავის ცენტრალურ კლინიკაში არიან მოთავსებული, მათ სხეულის ზედაპირული დაზიანებები აქვთ მიღებული.
ფაქტზე გამოძიება სსკ-ის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს.
ქარხნის ტერიტორიაზე რამდენიმე საათია შრომის ინსპექციის წარმომადგენლები მუშაობენ. ამ დრომდე მომხდარ ფაქტთან დაკავშირებით კომენტარი ქარხნის ადმინისტრაციას არ გაუკეთებია.