თბილისი, 7 ნოემბერი — Sputnik. საქართველოს თავდაცვის ყოფილი მინისტრი, ტელეარხ „ფორმულის“ დამფუძნებელი დავით კეზერაშვილი „ერთიანი ნაციონალური მოძრაობის“ ნარჩენების გადარჩენას ცდილობს, განაცხადა საქართველოს პარლამენტის ვიცე-სპიკერმა არჩილ თალაკვაძემ.
გასულ კვირაში ცნობილი გახდა, რომ დეპუტატმა ნონა მამულაშვილმა პარტია „ნაციონალური მოძრაობის“ დატოვებისა და დეპუტატის მანდატზე უარის თქმის გადაწყვეტილება მიიღო.
მანამდე, ოქტომბერში „ნაცმოძრაობა“ ნიკა ობოლაძემ დატოვა. პოლიტიკოსმა თავისი გადაწყვეტილების მიზეზად პარტიაში ენერგიის ნაკლებობა და ქვეყანაში რაღაცის შეცვლის სურვილის არარსებობა დაასახელა. ობოლაძე მიიჩნევს, რომ „ნაცმოძრაობის“ ამჟამინდელ შემადგენლობას არ აქვს შესაძლებლობა შეცვალოს ქვეყანაში ვითარება.
„ნაციონალური მოძრაობა“ და მათი პოლიტიკური გემი იძირება. დავით კეზერაშვილი ცდილობს ამ გემისგან გადარჩენილი ნაწილებით ნავი ან ტივი მაინც შეაკოწიწოს. „ნაციონალურ მოძრაობაში“ ღრმა კრიზისიდან გამომდინარე, დანარჩენმა ოპოზიციურმა ჯგუფებმა თუ ლიდერებმა დაინახეს, რომ უკვე ჩნდება თავისუფალი სივრცე ოპოზიციაში და ყველანაირად ცდილობენ ეს სივრცე აითვისონ", – განუცხადა ჟურნალისტებს თალაკვაძემ.
გარდა ამისა, თალაკვაძის თქმით, ოპოზიციაში „ნაციონალური მოძრაობის“ „კუთვნილი“ პოლიტიკური შავი ფულის, მათ მიერ მართული ტელევიზიების და გავლენების პირდაპირი გადანაწილების პროცესი მიმდინარეობს.
„მათ სცადეს ერთად, ცალ-ცალკეც, დამარცხდნენ არაერთხელ ორივე ფორმით. ამიტომ დღეს ოპოზიციამ შეიძლება გამოიტანოს ერთადერთი დასკვნა, რომ შესაკრებთა გადანაცვლებით გამარჯვების მიღწევა შეუძლებელია", – აღნიშნა ვიცე-სპიკერმა.
უფრო ადრე „ნაციონალური მოძრაობის“ თავმჯდომარემ ნიკა მელიამ განაცხადა, რომ ჯობს კეზერაშვილმა ოპოზიციისგან თავი შორს დაიჭიროს. მან აღნიშნა, რომ დღეს ხელისუფლების ოპონენტებს შორის არიან არა მხოლოდ ოპოზიციონერი პოლიტიკოსები, არამედ „მოოლიგარქო პერსონაჟებიც".
მაშინ ობოლაძემ განაცხადა, რომ მელიამ დავით კეზერაშვილის შესახებ თავისი სიტყვების გამო თანამდებობა უნდა დატოვოს. ობოლაძის პასუხად კი მელიამ განაცხადა, რომ არ აპირებს პოსტის დატოვებას და, ზოგადად, განსხვავებული აზრის გამოთქმა – ნორმალურია.
კეზერაშვილი, თავის მხრივ, აცხადებს, რომ პარტიული პოლიტიკა მას არ აინტერესებს და არასდროს ერეოდა და არც აპირებს ჩარევას ცალკეული ოპოზიციური პარტიების დღის წესრიგის განსაზღვრაში. მან აღნიშნა, რომ უარს არ იტყვის ხელისუფლებასთან საერთო ბრძოლაზე და გააგრძელებს სამოქალაქო სექტორისა და მასმედიის მხარდაჭერას.
გარჩევები „ნაციონალურ მოძრაობაში“
ვითარება პარტიაში მას შემდეგ გამწვავდა, რაც ნიკა მელიამ უკმაყოფილება გამოთქვა იმასთან დაკავშირებით, რომ კეზერაშვილი „ნაციონალური მოძრაობის" ერთ-ერთ ლიდერს, დეპუტატ ლევან ხაბეიშვილს აფინანსებს, განაცხადა პარტია „ქართული ოცნების" თავმჯდომარემ ირაკლი კობახიძემ.
მისი ინფორმაციით, პასუხად კეზერაშვილმა განაცხადა, რომ მელია პარტიის მხოლოდ ფორმალური თავმჯდომარეა.
„ქართულ ოცნებაში“ მიაჩნიათ, რომ ოპოზიციურ პარტიაში მიმდინარეობს ბრძოლა ფინანსებისა და შიდა გავლენების მოსაპოვებლად, რაც ბოლო პერიოდში განსაკუთრებით გამწვავდა.