თბილისი, 7 ნოემბერი − Sputnik. მსოფლიოში ყველაზე მაღალმა ქალმა რუმეისა გელგიმ ცხოვრებაში პირველად იმგზავრა თვითმფრინავით, რაც მანამდე შეუძლებელი იყო მისი სიმაღლიდან გამომდინარე.
გავრცელებული ინფორმაციით, მისი თურქეთიდან სან-ფრანცისკოში ფრენა Turkish Airlines-მა უზრუნველყო, რომელმაც თავისი ერთ-ერთი თვითმფრინავის სალონი სპეციალურად გადააკეთა და რუმეისა გელგის მოთხოვნებს მოარგო. ავიაკომპანიამ სალონიდან ექვსი სავარძელი აიღო და იქ საწოლი ჩადგა, რომელზე წამოწოლილმაც იმგზავრა „უმაღლესმა“ ქალმა.
„ეს იყო თავიდან ბოლომდე უზადო მგზავრობა. თვითმფრინავით პირველად ვიფრინე, მაგრამ არა უკანასკნელად“, − დაწერა მან სოციალურ ქსელში.
თურქეთის მოქალაქე, 25 წლის რუმეისა გელგი გინესის რეკორდების წიგნშია შესული. მისი სიმაღლე 215,16 სმ-ია. ქალს ვივერის სინდრომი აქვს − იშვიათი გენეტიკური დაავადება, რომლის დროსაც ძვლები ანომალიურად იზრდება.
რუმეისა პროგრამული უზრუნველყოფის სფეროში მუშაობს. შეერთებულ შტატებში ის ექვსი თვით დარჩება, რათა კარიერული წინსვლა განაგრძოს და გინესის რეკორდების წიგნთან ითანამშრომლოს.