თბილისი, 29 ოქტომბერი — Sputnik. ეკონომიკური ტენდენციები და რეფორმები, ასევე საქართველოს პერსპექტივები განიხილა საქართველოს ეკონომიკის მინისტრმა ლევან დავითაშვილმა საერთაშორისო სავალუტო ფონდის (სსფ) შემფასებელი მისიის წარმომადგენლებთან გამართულ შეხვედრაზე.
მისიის თბილისში ჩამოსვლას წინ უძღოდა სსფ-ისა და მსოფლიო ბანკის ყოველწლიური შეხვედრები, სადაც ქართულმა მხარემ ამ საერთაშორისო ორგანიზაციების ხელმძღვანელობასთან ვაშინგტონში მოლაპარაკებები გამართა. სსფ-ის მისიას ჯეიმს ჯონი ხელმძღვანელობს.
ეკონომიკის სამინისტროს პრეს-სამსახურის ცნობით, შეხვედრის მთავარი თემა იყო საქართველოს ეკონომიკური ტენდენციები, მიმდინარე და სამომავლო რეფორმები, მაკროეკონომიკური მაჩვენებლები და პროგნოზები.
მხარებმა განსაკუთრებული ყურადღება დაუთმეს ენერგეტიკული სექტორის განვითარების მხარდაჭერის ახალ სქემას, რომელიც ხელს შეუწყობს ენერგეტიკაში ინვესტიციების მოზიდვას, ახალი სიმძლავრეების ამოქმედებას და ქვეყნის ენერგეტიკული უსაფრთხოების ხარისხის გაზრდას.
აღინიშნა, რომ სავალუტო ფონდის პროგნოზით, გამოწვევების მიუხედავად, საქართველო ინარჩუნებს მაღალ ეკონომიკურ ზრდას საშუალოვადიან პერიოდში რეგიონის ქვეყნებს შორის, რაც გამოწვეულია ინფრასტრუქტურული ხარჯებით, პირდაპირი უცხოური ინვესტიციების შემოდინებით და სტრუქტურული რეფორმებით.
სტატისტიკის მიხედვით, 2022 წლის აგვისტოში რეალური მთლიანი შიდა პროდუქტის ზრდამ 10,5% შეადგინა 2021 წლის ანალოგიურ პერიოდთან შედარებით, ხოლო რვა თვის რეალური ზრდის ტემპის საშუალო მაჩვენებელი წლის დასაწყისიდან არის 10,3%.
სსფ უკვე მრავალი წელია, რაც საქართველოს სტრუქტურული რეფორმების რეალიზაციაში ეხმარება.
სსფ-ის აღმასრულებელმა საბჭომ უკვე დაამტკიცა საქართველოს მთავრობასთან Stand By-ს შეთანხმება 280 მილიონ დოლარზე.
საქართველოს ხელისუფლების პროგრამა, რომელსაც მხარს უჭერს სსფ, მიმართულია ქვეყანაში მაკროეკონომიკური სტაბილურობის შემდგომი გამყარებისკენ, საშუალოვადიანი ზრდის პერსპექტივების გაზრდისკენ რეგიონში არსებული გამოწვევების ფონზე.
საქართველოში ეკონომიკური რეფორმების მხარდაჭერისკენ მიმართული პირველი სამწლიანი პროგრამა, რომელიც სავალუტო ფონდმა 2017 წლის აპრილში დაამტკიცა, 2021 წელს დასრულდა. პროგრამის ფარგლებში გადარიცხვებმა 687 მლნ დოლარი შეადგინა.