თბილისი, 15 სექტემბერი - Sputnik. საქართველოს შინაგან საქმეთა მინისტრმა ვახტანგ გომელაურმა უარყო ბრალდებები, თითქოს ის სუსის უფროსის თანამდებობაზე ყოფნისას ვლადიკავკაზსა და მინსკში იმყოფებოდა და ფარულად ხვდებოდა „ეფესბეს“ ხელმძღვანელობას.
განცხადება იმის შესახებ, რომ გომელაურს ეს შეხვედრები ჰქონდა, ამჟამად პატიმრობაში მყოფმა სახელმწიფო უსაფრთხოების სამსახურის უფროსის ყოფილმა მოადგილემ, სოსო გოგაშვილმა გააკეთა. ამ ინფორმაციით აღშფოთებული ოპოზიციონერები პარლამენტში საგამოძიებო კომისიის შექმნის აუცილებლობაზე ალაპარაკდნენ.
„ვლადიკავკაზში არ ვყოფილვარ, მაგრამ მინსკში ძალიან ბევრჯერ ვარ ნამყოფი, ალბათ, 5-6 ვიზიტი მაქვს ჩატარებული. არანაირი კომუნიკაცია არ გვქონია. ოფიციალურ შეხვედრებზე ჩავდიოდით და ვხვდებოდით ჩვენს კოლეგებს, იყო ოფიციალური შეხვედრები. სხვა არაფერი არ ყოფილა“,- განაცხადა გომელაურმა.
ამასთან, მან აღნიშნა, რომ მინსკში გამართულ ღონისძიებას, სადაც „ეფესბეს“ მაღალჩინოსნები იმყოფებოდნენ, ასევე ესწრებოდნენ ევროპის ქვეყნებისა და შეერთებული შტატების უსაფრთხოების სამსახურების წარმომადგენლები.
„იყო 100 წლისთავი, იყო იუბილე და იყო ყველა, სხვადასხვა ქვეყნებიდან ჩამოსული იყო პირველი ან მეორე პირები, რომლებიც ულოცავდნენ ბელორუსიის უსაფრთხოების სამსახურს შექმნის დღეს. ასევე იყო აზერბაიჯანშიც, სადაც ჩავედით ჩვენც... იქ იყვნენ ამერიკის წარმომადგენლებიც, ბრიტანეთის წარმომადგენლებიც, რუსეთიდანაც იყვნენ... პირისპირ შეხვედრა არასდროს გვქონია“, - განაცხადა გომელაურმა.
მან ხაზგასმით აღნიშნა, რომ საქართველოს სპეცსამსახურებს რუსეთის სპეცსამსახურებთან არანაირი კომუნიკაცია არ აქვთ.
ამასთან მან აღნიშნა, რომ მზად არის უპასუხოს კითხვებს პარლამენტში საგამოძიებო კომისიის ფორმატშიც.
„საგამოძიებო კომისია თუ შეიქმნება, შეიქმნას, მივალ და პასუხებს გავცემ. თუმცა მათ ვუსვამ კითხვას - თუნდაც შევხვდი ფარულად და ფარულად ბევრს შევხვედრივარ, ვგულისხმობ იმას, რომ ტელევიზიის წინაშე არ გაგვიპიარებია შეხვედრა. შევხვედრივარ, ვთქვათ, ისრაელის, თურქეთის, აზერბაიჯანის, სომხეთისა და სხვადასხვა ქვეყნის სამსახურის წარმომადგენლებს, ეს დანაშაულია? ომის დროს ხვდებიან სპეცსამსახურები და ლაპარაკობენ, რაც ღიად არ გამოდის“, - განაცხადა ვახტანგ გომელაურმა.
გომელაური ხელმძღვანელობდა სახელმწიფო უსაფრთხოების სამსახურს 2015-2019 წლებში, შემდეგ კი კვლავ შინაგან საქმეთა სამინისტროს ჩაუდგა სათავეში, რომელსაც 2015 წლის იანვარ-სექტემბერში ხელმძღვანელობდა.