ბოლო კვირების განმავლობაში დასავლურმა მედიამ არაერთხელ დაწერა მილიარდერი ნიკოლა პელტცისა და მისი დედამთილის ვიკტორია ბექჰემის უთანხმოების შესახებ. ინსაიდერების განცხადებით, ისინი ერთმანეთს საერთოდ არ ეკონტაქტებიან. როგორც ირკვევა, საზოგადოების აზრი ნიკოლას საკმაოდ აღელვებს და ჭორები მისთვის მტკივნეულია.
ბოლოს და ბოლოს, რძალ-დედამთილს შორის გაჩაღებული „ცივი ომის“ დეტალები გაშიფრულია. ნიკოლამ და ბრუკლინ ბექჰემმა დუმილი დაარღვიეს. მათ გამოცემა Variety-ს ინტერვიუ მისცეს, სადაც ბრუკლინმა განაცხადა, რომ ყველაფერი კარგადაა და ერთმანეთის მიმართ ყველა მეგობრულადაა განწყობილი.
27 წლის ნიკოლა აცხადებს, რომ ჭორები კაბის გამო გაჩნდა. თავდაპირველად გადაწყდა, რომ მას ქორწილში ვიკტორიას მიერ შექმნილი კაბა უნდა ჩაეცვა, თუმცა შემდეგ გადაიფიქრა და არჩევანი „ვალენტინოს“ კაბაზე შეაჩერა.
„მე მინდოდა და ვაპირებდი კიდეც მისი კაბის ჩაცმას, თუმცა რამდენიმე თვეში მივხვდით, რომ მისი ატელიე ვერ შეძლებდა იმის გაკეთებას, რაც საჭირო იყო. ამიტომაც საჭირო გახდა სხვა კაბის არჩევა. აი, საიდან გაჩნდა ჭორები“, – აღნიშნა ნიკოლამ.