თბილისი, 3 აგვისტო – Sputnik. საქართველოს პარლამენტის თავმჯდომარემ შალვა პაპუაშვილმა ანტისამთავრობო კამპანიის ნაწილი უწოდა ერთ-ერთი არასამთავრობო ორგანიზაციის კვლევას საქართველოს რუსეთზე ეკონომიკური დამოკიდებულების ზრდის შესახებ უკრაინაში მიმდინარე მოვლენების ფონზე.
ასეთ დასკვნამდე კვლევის ავტორები მას შემდეგ მივიდნენ, რაც შეადარეს 2022 წლის იანვარი–ივნისის მონაცემები გასული წლების მონაცემებს რუსეთთან სავაჭრო ურთიერთობების, რუსი ტურისტების, ფულადი გადარიცხვების, პირდაპირი უცხოური ინვესტიციების, რუსული კომპანიების საქართველოში დარეგისტრირების შესახებ.
„არის, ასე ვთქვათ, გარკვეული ტრენდი – „საქართველო რუსეთზე დამოკიდებულია“, „საქართველო დასავლეთს სცილდება“... შემოსვლის კუთხით არაფერი შეცვლილა არც რაოდენობაში, არც ვიზასთან დაკავშირებით“, – განაცხადა პაპუაშვილმა.
კვლევის თანახმად, 2022 წლის იანვარი–ივნისში საქართველომ ფულადი გზავნილებით, ტურიზმითა და საქონლის რუსეთში ექსპორტით დაახლოებით 1,2 მილიარდი დოლარის მოგება ნახა, რაც 2,5-ჯერ მეტია 2021 წლის ანალოგიური პერიოდის მონაცემზე. გარდა ამისა, ეს 35%-ით მეტია 2019 წლის, პანდემიამდელ პერიოდთან შედარებით.
„ეს ნიშნავს, რომ გასულ წლებთან შედარებით საქართველოს რუსეთზე ეკონომიკური დამოკიდებულება იზრდება“, – ნათქვამია კვლევაში და აღნიშნულია, რომ ეს საქართველოსთვის საშიშია.
ეს პროცესი ძირითადად ფულადი გზავნილების ზრდას უკავშირდება. წლის პირველ ნახევარში რუსეთიდან საქართველოში ფულადი გადმორიცხვები 6,5-ჯერ გაიზარდა და 678 მლნ დოლარი შეადგინა.
ამასთან, ექსპორტი შემცირდა 2,8%-ით და 256 მლნ დოლარი შეადგინა. უკრაინაში კონფლიქტის დაწყების შემდეგ, მარტი–ივნისში ექსპორტი 16%-ით შემცირდა.
საქართველოში ხორბლისა და ფქვილის შემოტანაში წლის პირველ ექვს თვეში რუსეთის წილი 95%-ია.
კვლევაში ასევე ნათქვამია, რომ რუსი ვიზიტორების რაოდენობის ზრდის ტემპი არსებითად დაჩქარდა – 2022 წლის იანვარი–ივნისში ქვეყანას 247 ათასი რუსი ეწვია, თუმცა ეს სამჯერ ნაკლებია, ვიდრე 2019 წელს.
საქართველოში მარტიდან ივნისის ჩათვლით დაახლოებით 6,4 ათასი რუსული კომპანია დარეგისტრირდა, რაც 2021 წლის მონაცემზე შვიდჯერ მეტია. ამ კომპანიების 93% ინდივიდუალური მეწარმეები არიან, რაც ნიშნავს, რომ რუსეთის მოქალაქეების ნაწილი საქართველოში გადმოვიდა საცხოვრებლად და ბიზნესის წარმოებისთვის.
საქართველოში სულ დარეგისტრირებულია დაახლოებით 13,5 ათასი რუსული კომპანია, ნათქვამია კვლევაში.