თბილისი, 18 ივლისი — Sputnik. 2026 წლამდე საქართველოში საჯარო მოხელეების ხელფასები ყოველწლიურად დაახლოებით 10%-ით მოიმატებს, განაცხადა ფინანსთა მინისტრმა ლაშა ხუციშვილმა მთავრობის სხდომის დასრულების შემდეგ გამართულ ბრიფინგზე.
დღეს გამართულ მთავრობის სხდომაზე შეათანხმეს გრძელვადიან პერსპექტივაში აღნიშნული საკითხის დარეგულირების ძირითადი პრინციპები და მიიღეს დადგენილება.
2026 წლის 1 იანვრიდან საჯარო სექტორში ხელფასების გაზრდა მოხდება ბოლო 4 კვარტლის განმავლობაში კერძო სექტორში საშუალო ხელფასის პროცენტული მაჩვენებლიდან გამომდინარე.
ამასთან, საჯარო მოხელეების საბაზო თანამდებობრივი სარგო უნდა იყოს საჯარო სექტორში არსებული საშუალო ხელფასის არანაკლებ 80% და არაუმეტეს 90%-სა. დღეისათვის ეს მაჩვენებელი დაახლოებით 74%-ია.
მთავრობის დადგენილება ასახვას ჰპოვებს საკანონმდებლო დონეზე – სახელმწიფი ბიუჯეტის შესახებ კანონში, განაცხადა ხუციშვილმა.