ფულადი გზავნილები საქართველოში - ბოლო ექვსი თვის სტატისტიკა

თბილისი, 16 ივლისი — Sputnik. საქართველოს კომერციულ ბანკებში ელექტრონული სისტემებით განხორციელებული ფულადი გზავნილების მოცულობა 2022 წლის იანვარ-ივნისში წინა წლის ანალოგიური პერიოდის მაჩვენებელთან შედარებით 65%-ით გაიზარდა და 1.786,5 მლნ აშშ დოლარი შეადგინა, იუწყება საქართველოს ეროვნული ბანკი.

ფულადი გზავნილების მოცულობით ამჟამად კვლავ რუსეთი ლიდერობს, რომელმაც რამდენიმე თვის მანძილზე პირველობა იტალიას დაუთმო.

ეროვნული ბანკის მონაცემებით, საანგარიშო პერიოდში რუსეთიდან საქართველოში გადმორიცხული თანხის მოცულობამ 749,6 მილიონი დოლარი შეადგინა. ეს ქართულ კომერციულ ბანკებში ელექტრონული სისტემებით ფულადი გადარიცხვების 42%-ია.

ივნისში, გასული წლის ანალოგიურ პერიოდთან შედარებით, რუსეთიდან 231,4 მლნ დოლარი გადმოირიცხა (გზავნილების მთლიანი მოცულობის 54,2%), რაც გასული წლის ანალოგიურ პერიოდთან შედარებით 492,2%-ით მეტია.

ივნისში საქართველოდან საზღვარგარეთ 29,6 მლნ დოლარი გადაიგზავნა, რაც 2021 წლის ივნისთან შედარებით 11,7%-ით მეტია.

2022 წლის პირველ ექვს თვეში საქართველოდან უცხოეთში 157,7 მლნ დოლარი გადაიგზავნა, რაც 2021 წლის ანალოგიურ პერიოდთან შედარებით 14,1%-ით მეტია.

წყარო - საქართველოს ეროვნული ბანკი.