თბილისი, 2 ივნისი – Sputnik. წამების მსხვერპლთა რეაბილიტაციის საერთაშორისო ცენტრი „ემპათიის“ ხელმძღვანელი მარიამ ჯიშკარიანი მიიჩნევს, რომ მკურნალობა, რომელსაც საქართველოს ექს-პრეზიდენტი მიხეილ სააკაშვილი კლინიკა „ვივამედში“ იღებს, არ გამომდინარეობს მისი დიაგნოზიდან, ამიტომ „შედეგი ნულია“.
პატიმარი სააკაშვილი 12 მაისიდან კლინიკა „ვივამედში“ მკურნალობს. მისი ჯანმრთელობის მდგომარეობა 50-დღიანი შიმშილობის შემდეგ გაუარესდა, რომელიც მან დაპატიმრებისთანავე, 2021 წლის 1 ოქტომბერს გამოაცხადა. ექს-პრეზიდენტის ოჯახი და მისი მხარდამჭერები სამკურნალოდ მის საზღვარგარეთ გადაყვანას მოითხოვენ.
მარიამ ჯიშკარიანის თქმით, პენიტენციურ სისტემაში თავის დროზე სააკაშვილს არასწორი დიაგნოზი დაუსვეს, ახლა კი მას უბრალოდ სიპტომურად მკურნალობენ.
„ჩვენ არაერთგზის აღვნიშნეთ, რომ მკურნალობა და დიაგნოსტიკა იყო არასწორი. მაგალითად, დეკემბერში გაცემული იყო რეკომენდაცია – ჩატარებულიყო თავის ტვინის მრტ კვლევა, ის კი მხოლოდ მაისში ჩატარდა. ეს ადეკვატურად თუ გესახებათ, არ ვიცი“, – განაცხადა ჯიშკარიანმა.
მან ასევე აღნიშნა, რომ დეკემბერში მათ მიერ რეკომენდებული ნეირომიოგრაფია სააკაშვილს მხოლოდ მარტში ჩაუტარდა, ამიტომ, მისი თქმით, მკურნალობას არ შეიძლება ადეკვატური ეწოდოს.
ჯიშკარიანის აზრით, აუცილებელია მიხეილ სააკაშვილის საზღვარგარეთ მრავალპროფილურ ცენტრში გადაყვანა, სადაც მას ჩაუტარებენ კვებით აღდგენის თერაპიას, ანუ ნუტრიციულ რეაბილიტაციას.
იუსტიციის მინისტრმა რატი ბრეგაძემ, თავის მხრივ, განაცხადა, რომ მისი უწყება სამართლებრივი საფუძვლების გარეშე საპატიმროდან არცერთ პატიმარს არ გაუშვებს, მათ შორის არც ექს-პრეზიდენტს.
სააკაშვილი, რომლის წინააღმდეგაც საქართველოში რამდენიმე სისხლის სამართლის საქმეა აღძრული, უკრაინიდან სამშობლოში 2021 წლის 29 სექტემბერს არალეგალურად დაბრუნდა.
საზღვრის უკანონო კვეთის საქმის გარდა, სასამართლო სააკაშვილის წინააღმდეგ იხილავს კიდევ ორ საქმეს. ერთი ეხება 2007 წლის 7 ნოემბრის აქციის ძალადობრივ დარბევას, მეორე – სახელმწიფო სახსრების გაფლანგვას, რომელსაც „პიჯაკების საქმე“ უწოდეს.
სააკაშვილს განაჩენი დაუსწრებლად უკვე გამოტანილი აქვს სისხლის სამართლის ორ საქმეზე – გირგვლიანის მკვლელობაში მსჯავრდებულების შეწყალებისა და დეპუტატ ვალერი გელაშვილის ცემის საქმეებზე.