თბილისი, 18 აპრილი – Sputnik. საქართველომ თვითშეფასების კითხვარი ევროკავშირის წევრობის კანდიდატი ქვეყნის სტატუსის მისაღებად მაისის შუა რიცხვებამდე უნდა შეავსოს, განაცხადა საქართველოს პარლამენტის თავმჯდომარემ შალვა პაპუაშვილმა.
საქართველომ კითხვარი 11 აპრილს მიიღო. კითხვარის შესავსებად საქართველოს ერთი თვე აქვს. საქართველოსთვის ევროკავშირის კანდიდატის სტატუსის მინიჭებასთან დაკავშირებით საბოლოო გადაწყვეტილების მიღება 2022 წლის ივნისში დაგეგმილ ევროკავშირის საბჭოს სხდომაზე იგეგმება.
„ერთი თვე არის ვადა შესავსებად და ამ ვადებს მიჰყვებიან შესაბამისი უწყებები... დაახლოებით უწევს მაისის შუა რიცხვები პასუხების გასაგზავნად“, – განუცხადა ჟურნალისტებს პაპუაშვილმა.
მისი თქმით, საბჭოს სხდომაზე პრემიერ-მინისტრ ირაკლი ღარიბაშვილის ხელმძღვანელობით კითხვები გადანაწილდა შესაბამის უწყებებს შორის.
„გარდა ამისა, ჩვენ ველოდებით კითხვარის მეორე ნაწილს. აქ, შესაბამისად, ვადები სხვა იქნება“, – აღნიშნა პაპუაშვილმა.
მისი სიტყვებით, კითხვარის შევსების პროცესს კოორდინაციას უწევს პარლამენტის თავმჯდომარის კაბინეტი. რაც შეეხება დოკუმენტს, რომელიც გასულ კვირაში გამოქვეყნდა, პაპუაშვილის თქმით, ეს არის საკანონმდებლო და ინსტიტუციური ჩარჩოს ფაქტობრივი მდგომარეობის აღწერა და ის არ შეიცავს შეფასებითი კატეგორიის კითხვებს.
„იქ არასწორი პასუხი ვერ იქნება, ვინაიდან დაფუძნებულია ფაქტობრივ, საკანონმდებლო და ინსტიტუციურ მონაცემებზე“, – განაცხადა მან.
კითხვარში 369 კითხვაა, რაც გაცილებით ნაკლებია, ვიდრე ევროკავშირის რომელიმე პარტნიორს აქამდე მიუღია. მანამდე ევროკავშირში გაწევრიანების მსურველები 2.000-დან 5.000-მდე კითხვაზე სცემდნენ პასუხს.
ევროკავშირში წევრობაზე განაცხადი მანამდე უკრაინამ შეიტანა. ევროპარლამენტმა ხმათა უმრავლესობით მხარი დაუჭირა რეზოლუციას უკრაინისთვის ევროკავშირში წევრობის კანდიდატი ქვეყნის სტატუსის მინიჭების შესახებ.
ამის შემდეგ მმართველი პარტია „ქართული ოცნება - დემოკრატიული საქართველოს“ თავმჯდომარემ ირაკლი კობახიძემ ევროკავშირს მოუწოდა, „საგანგებო წესით“ განიხილოს საქართველოს განაცხადი და ქვეყნისთვის ევროკავშირში წევრობის კანდიდატი ქვეყნის სტატუსის მინიჭების შესახებ გადაწყვეტილება მიიღოს.
საქართველომ ევროკავშირთან ასოცირების ხელშეკრულებას, რომლის განუყოფელი ნაწილია შეთანხმება ყოვლისმომცველი თავისუფალი ვაჭრობის ზონის შესახებ, ხელი 2014 წელს მოაწერა. 2017 წლის მარტიდან საქართველოს მოქალაქეებმა შენგენის ზონის ქვეყნებში უვიზო მოკლევადიანი ვიზიტების (180 დღის მანძილზე ჯამში 90 დღით) უფლება მოიპოვეს.