თბილისი, 22 მარტი – Sputnik. უწყებათშორისი საკოორდინაციო საბჭოს გადაწყვეტილებით, უქმდება კორონავირუსის გავრცელების პრევენციის მიზნით დაწესებული ყველა შეზღუდვა, გარდა ტრანსპორტსა და დახურულ სივრცეში პირბადის ტარების ვალდებულებისა.
საკოორდინაციო საბჭომ შესაბამისი გადაწყვეტილება არსებული ეპიდემიოლოგიური მდგომარეობის ანალიზის საფუძველზე დღეს გამართულ სხდომაზე მიიღო.
საკოორდინაციო საბჭოს გადაწყვეტილებით 28 მარტიდან:
უქმდება ღია სივრცეში პირბადის ტარების ვალდებულება და მისი ტარება სავალდებულო იქნება მხოლოდ დახურულ სივრცეებსა და საზოგადოებრივ ტრანსპორტში;
უქმდება როგორც საზოგადოებრივი კვების ობიექტებში, ისე სპორტულ, სახელოვნებო თუ სხვა სახის სოციალურ ღონისძიებებზე დამსწრეთა რაოდენობრივი შეზღუდვა;
უქმდება თვითიზოლაციის ვალდებულება საქართველოს იმ მოქალაქეებისთვის, რომლებიც ქვეყანაში PCR–ტესტის გარეშე ბრუნდებიან;
დისტანციურ სამუშაო რეჟიმში მყოფი საჯარო მოხელეები სამუშაო ადგილებს დაუბრუნდებიან.
უწყებათშორისი საკოორდინაციო საბჭოს გადაწყვეტილებით, აპრილის განმავლობაში გაგრძელდება ვაქცინაციის წახალისების პროგრამა. შესაბამისად, 50 წელს ზემოთ პირები ვაქცინის პირველი დოზით აცრის შემთხვევაში 200 ლარს მიიღებენ, ხოლო ე.წ. ბუსტერ დოზით აცრის შემთხვევაში ამავე ასაკობრივი ჯგუფის პირებს 100 ლარი ჩაერიცხებათ.
წყარო: საქართველოს მთავრობა