თბილისი, 18 მარტი – Sputnik. საქართველოს კინემატოგრაფიის ეროვნულმა ცენტრმა მოკლემეტრაჟიანი მხატვრული ფილმების რეჟისორებისთვის კონკურსი გამოაცხადა.
კონკურსის მიზანია საქართველოს სახელმწიფო ბიუჯეტიდან გამოყოფილი სახსრებით ეროვნული მოკლემეტრაჟიანი მხატვრული ფილმის (ფილმების) წარმოების დაფინანსება.
პროექტის განაცხადი წარდგენილი უნდა იყოს პროდიუსერის მიერ, რომელიც არის ინდივიდუალური მეწარმე ან იურიდიული პირი. პროდიუსერს არ უნდა გააჩნდეს სახელმწიფოს მიმართ ვადაგადაცილებული საგადასახადო დავალიანება და არ უნდა იყოს რეგისტრირებული მოვალეთა რეესტრში.
რაც შეეხება რეჟისორს, ის არ უნდა იყოს იმ ფილმის ავტორი, რომელსაც მოგებული აქვს ეროვნული კინოცენტრის წარმოების დაფინანსების სხვა კონკურსი და ნამუშევარი დასრულებული არ არის. ამასთან, მან კინოცენტრს უნდა წარუდგინოს სულ მცირე ერთი საკუთარი სარეჟისორო ნამუშევარი.
კონკურსზე არ დაიშვება პროექტი, რომელიც მონაწილეობს კინოცენტრის მიერ გამოცხადებულ სხვა კონკურსში.
კონკურსზე დარეგისტრირების შემდეგ ეროვნული კინოცენტრის ფილმწარმოების დეპარტამენტი ამოწმებს დოკუმენტაციის სისრულეს და სისწორეს. ხარვეზების აღმოჩენის შემთხვევაში კინოცენტრი უკავშირდება კონკურსანტს და აძლევს ხუთ სამუშაო დღეს ხარვეზების აღმოსაფხვრელად.
შემდეგ პროექტები გადაეცემა საექსპერტო კომისიას, რომლის შემადგენლობას ამტკიცებს ეროვნული კინოცენტრის დირექტორი. თუ პროექტი ვერ აკმაყოფილებს კონკურსის მოთხოვნებს, ის საექსპერტო კომისიას არ გადაეცემა განსახილველად.
ეროვნული კინოცენტრი კომისიის დასკვნის საფუძველზე და თავისი ფინანსური შესაძლებლობების ფარგლებში იღებს გადაწყვეტილებას დასაფინანსებელი პროექტების რაოდენობის თაობაზე, ადგენს თითოეული პროექტისთვის დაფინანსების ოდენობას პროექტის შემომტან პროდიუსერთან ერთად ბიუჯეტის კიდევ ერთხელ დეტალურად განხილვის შემდეგ.
საკონკურსო ფონდი 250 ათას ლარს შეადგენს. კონკურსში გამარჯვებული პროექტი ან პროექტები ეროვნული კინოცენტრისგან ფილმის მთლიანი ბიუჯეტის 75%-მდე თანხას მიიღებს ან მიიღებენ. დანარჩენი შევსებული უნდა იყოს დაფინანსების სხვა წყაროებიდან.
განაცხადები მიიღება 20 აპრილის 17:00 საათამდე.