თბილისი, 10 მარტი – Sputnik. საერთაშორისო მნიშვნელობის თბილისი–სენაკი–ლესელიძის საავტომობილო გზაზე ავტოტრანსპორტის მოძრაობა თავისუფალია, იუწყება საავტომობილო გზების დეპარტამენტი.
ინტენსიური თოვის და ლიპყინულის გამო აღნიშნული გზის 138–158 კმ მონაკვეთზე (ჩუმათელეთი–ხუნევი) აკრძალული იყო მისაბმელიანი და ნახევარმისაბმელიანი ავტოტრანსპორტის მოძრაობა.
დეპარტამენტის ცნობით, ჩატარებული ინტენსიური გაწმენდითი სამუშაოების შედეგად ავტოტრანსპორტის მოძრაობა აღდგენილია ასევე საერთაშორისო მნიშვნელობის ახალქალაქი–კარწახის გზაზეც.
თოვის, ქარბუქისა და ცუდი ხილვადობის გამო აღნიშნული გზის 1-36 კმ მონაკვეთზე აკრძალული იყო მისაბმელიანი, ნახევარმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა.
გაწმენდითი სამუშაოების შედეგად ავტოტრანსპორტისთვის მოძრაობა შეფერხების გარეშე ხორციელდება შიდასახელმწიფოებრივი მნიშვნელობის გომი–საჩხერე–ჭიათურა–ზესტაფონის საავტომობილო გზაზეც.
თოვისა და დაბალი ტემპერატურის გამო აღნიშნული გზის 1-52 კმ მონაკვეთზე აკრძალული იყო მისაბმელიანი და ნახევარმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა არ შეზღუდულა.
რთული მეტეოროლოგიური პირობების (ქარბუქი, ნამქერები, შეზღუდული ხილვადობა) გამო ამ დროისთვის კვლავ ძალაში რჩება შიდასახელმწიფოებრივი მნიშვნელობის კოდა–ფარცხისი–მანგლისი–წალკა–ნინოწმინდის საავტომობილო გზის 94-110 კმ მონაკვეთზე (ფარავანის უღელტეხილი) დაწესებული აკრძალვები.
საავტომობილო გზების დეპარტამენტის ინფორმაციით, გზის აღნიშნულ მონაკვეთზე აკრძალულია ყველა სახის ავტოტრანსპორტის მოძრაობა.