თბილისი, 5 თებერვალი – Sputnik. საქართველოში გაუქმდა „მწვანე პასპორტების“ წარდგენის ვალდებულება გარკვეულ საჯარო დაწესებულებაში სტუმრობისას, გაიხსნა კაზინოები და სასტუმროებს კონცერტების გამართვის უფლება მიესცა.
შესაბამისი ცვლილებები შევიდა მთავრობის დადგენილებაში „იზოლაციისა და კარანტინის წესების დამტკიცების შესახებ“.
„მწვანე პასპორტი“ აღარ არის საჭირო რესტორნებში, თეატრებში, ფიტნეს-ცენტრებსა და სხვა საზოგადოებრივ დაწესებულებებში შესვლისას.
კონცერტების გამართვა შესაძლებელია იმ სასტუმროების ტერიტორიაზე, რომლებსაც აქვთ შესაბამისი ინფრასტრუქტურა და დაცულია ჯანდაცვის სამინისტროს პროტოკოლის ყველა პირობა.
ყველა კაზინო და ტოტალიზატორი ოფიციალურად გაიხსნა, ნათქვამია ცვლილებებში.
ამავდროულად, ქვეყანაში კვლავ მოქმედებს აკრძალვა ნებისმიერი გასართობი და კულტურული ღონისძიების გამართვაზე, გარდა სპექტაკლებისა და ფილმების ჩვენებისა, ფესტივალებისა და ხელოვნებასთან დაკავშირებული ღონისძიებებისა. ასევე აკრძალულია მასობრივი შეკრებები და პირბადის ტარება სავალდებულოა როგორც დახურულ საზოგადოებრივ ადგილებში, ასევე ქუჩაში.
საქართველო „ომიკრონით" გამოწვეულ კორონავირუსის მეექვსე ტალღას ებრძვის, რომელთანაც დაკავშირებულია ბოლო დღეების ანტირეკორდები. შაბათს კორონავირუსის 23 ათასზე მეტი შემთხვევა გამოვლინდა, მაშინ, როდესაც იანვრის შუა პერიოდში ინფიცირებულთა საშუალო მაჩვენებელი 4–5 ათასი იყო.