თბილისი, 28 იანვარი – Sputnik. ბათუმში 13 ეკომიგრანტ ოჯახს საცხოვრებელი ფართები საკუთრებაში გადაეცა.
აჭარის ჯანდაცვის სამინისტროს ინფორმაციით, 2022 წელს უწყებამ ეკომიგრანტი ოჯახების საცხოვრებლით უზრუნველყოფის მიზნით გათვალისწინებული თანადაფინანსება 30 ათას ლარამდე გაზარდა. შესაბამისად, აღნიშნულმა ოჯახებმა საცხოვრებელი სახლები გაზრდილი თანადაფინანსებით შეიძინეს.
„2016 წლიდან დღემდე პროგრამის ფარგლებში საცხოვრებელი 558-მა ოჯახმა შეიძინა. აღნიშნული პროგრამით საცხოვრებლის პრობლემა ათეული წლის წინ სტიქიის შედეგად დაზარალებულ არაერთ ოჯახს მოეხსნა. პროგრამა ვრცელდება აჭარაში მცხოვრებ ყველა ეკომიგრანტ ოჯახზე“, – განაცხადა აჭარის ჯანდაცვის მინისტრის პირველმა მოადგილემ რამაზ ჯინჭარაძემ.
მისი განცხადებით, წელს აჭარის მთავრობამ დაფინანსება გაზარდა როგორც ეკომიგრანტებისთვის, ისე ხანძრით დაზარალებული ოჯახების საცხოვრებლის შეძენის ან რეაბილიტაციისთვის.
კერძოდ, ხანძრით დაზარალებული ოჯახების სახლების რეაბილიტაცია/მშენებლობისთვის თანადაფინანსება 15 ათასი ლარიდან 20 ათას ლარამდე გაიზარდა.
„ეკომიგრანტი ოჯახების საცხოვრებლით უზრუნველყოფის“ პროგრამის ფარგლებში აჭარაში წელს საცხოვრებელ ფართებს თანადაფინანსებით ჯამში 100 ეკომიგრანტი ოჯახი შეიძენს. პროგრამის საერთო ბიუჯეტი 3 მილიონი ლარია.
წყარო: აჭარის ჯანდაცვის სამინისტრო