თბილისი, 19 იანვარი — Sputnik. აშშ-ის მობილურმა ოპერატორებმა აეროპორტების მახლობლად 5G ანძების ამუშავება გადადეს, გაითვალისწინეს რა აეროპორტების ხელმძღვანელების მოწოდება, იუწყება The Wall Street Journal.
გავრცელებული ინფორმაციით, 5G ანძების მონტაჟი აეროპორტებთან 19 იანვარს უნდა დაწყებულიყო.
როგორც ქვეყნის უმსხვილესი ოპერატორები AT&T და Verizon-ი აცხადებენ, აეროპორტების მახლობლად განთავსებულ ანძებს ჯერ არ გაააქტიურებენ. პრეზიდენტმა ჯო ბაიდენმა მადლობა გადაუხადა მათ ამ გადაწყვეტილებისთვის.
„ეს გადაწყვეტილება თავიდან აგვარიდებს პოტენციურად დამანგრეველ შეფერხებებს სამგზავრო გადაზიდვებში, სატვირთო ოპერაციებსა და ჩვენი ეკონომიკის აღდგენაში“, — ნათქვამია ბაიდენის განცხადებაში.
ამასთან პრეზიდენტმა აღნიშნა, რომ 5G-ინფრასტრუქტურის 90%-ზე მეტი მწყობრში გრაფიკის თანახმად შევა.
მანამდე შტატების უდიდესი აეროპორტების ხელმძღვანელებმა განაცხადეს, რომ 5G მოწყობილობების განთავსება აეროპორტებთან ახლოს „კატასტროფულ საავიაციო კრიზისს“ გამოიწვევს ამუშავებიდან დაახლოებით 36 საათში. მათი თქმით, ახალ სერვის C-Band 5G-ს შეუძლია, მწყობრიდან გამოიყვანოს თვითმფრინავები და ქაოსი გამოიწვიოს აშშ-ის მიმართულებით რეისებზე.
აშშ-ის ფედერალურმა საავიაციო სააგენტომ გააფრთხილა ხელისუფლება, რომ დანადგარებმა შეიძლება გავლენა მოახდინოს თვითმფრინავების კრიტიკულად მგრძნობიარე ხელსაწყოებზე.