თბილისი, 15 იანვარი – Sputnik. საკონკურსო კომისიამ საქართველოს ცენტრალური საარჩევნო კომისიის თავმჯდომარეობისა და წევრობის კანდიდატები შეარჩია, ნათქვამია საქართველოს პრეზიდენტის ადმინისტრაციის განცხადებაში.
ცესკოს თავმჯდომარის პოსტზე ოთხი კანდიდატი იბრძოდა: ცენტრალური საარჩევნო კომისიის მოქმედი თავმჯდომარე გიორგი კალანდარიშვილი, ვაკის საოლქო კომისიის თავმჯდომარე თამაზ ფოლადაშვილი, სახელმწიფო ტექნიკური უნივერსიტეტის ლექტორი და კონსტიტუციონალისტი თენგიზ თევზაძე და ენერგეტიკის ასოციაციის დამფუძნებელი გიორგი შაიშმელაშვილი.
კომისიამ პრეზიდენტს სამი კანდიდატურა წარუდგინა, შერჩევა მხოლოდ გიორგი შაიშმელაშვილმა ვერ გაიარა.
რაც შეეხება კომისიის წევრებს, ორ ვაკანტურ თანამდებობაზე პრეზიდენტს ოთხი კანდიდატი წარუდგინეს: ქრისტინე ქაჯაია, ლევან ისაკაძე, მაია ზარიძე და გია ცაცაშვილი.
კანონმდებლობის მიხედვით, საქართველოს პრეზიდენტმა თითო ადგილზე ორ-ორი კანდიდატი უნდა შეარჩიოს და პარლამენტს წაუდგინოს.
დეპუტატები კანდიდატებს მოუსმენენ და კენჭისყრის პროცედურა დაიწყება. ცესკოს თავმჯდომარე გახდება ის კანდიდატი, რომელიც პარლამენტში ამჟამად წარმოდგენილი 148 დეპუტატიდან 2/3-ის მხარდაჭერას მიიღებს.
თუ ვერც ერთმა კანდიდატმა ვერ მოიპოვა ასეთი მხარდაჭერა, ჩატარდება მეორე კენჭისყრა და კანდიდატი, რომელიც დეპუტატთა ხმების უმრავლესობას მიიღებს, საქართველოს ცესკოს თავმჯდომარე გახდება.
დღეისათვის არცერთ პარტიას არ გააჩნია ხმების 2/3 იმისათვის, რომ რომელიმე კანდიდატის მხარდაჭერა უზრუნველყოს. თუმცა, „ქართულ ოცნებას“ აქვს საკმარისი მანდატები, რათა განმეორებით კენჭისყრაზე საქართველოს ცენტრალური საარჩევნო კომისიის თავმჯდომარის თანამდებობაზე საკუთარი კანდიდატი გაიყვანოს.
წყარო - პრეზიდენტის ადმინისტრაცია