კორონავირუსის პროფილაქტიკის მთავარი ხერხი – ექიმი გვირჩევს

თბილისი, 13 იანვარი – Sputnik. კორონავირუსის პროფილაქტიკის საუკეთესო საშუალება დღეს ვაქცინაცია, მოსახლეობის მასობრივი იმუნიზაციაა, განუცხადა Sputnik–საქართველოს ექიმმა–თერაპევტმა მაია რატიანმა.

„კიდევ ერთხელ გავიმეორებ: პანდემიასთან ბრძოლისა და მისი პროფილაქტიკისთვის ვაქცინაციაზე საუკეთესო საშუალება ჯერჯერობით არ არსებობს“, – აღნიშნა ექიმმა.

მისი თქმით, ვაქცინაცია ინფიცირებისგან არ იცავს, მაგრამ იცავს გართულებებისგან.

ექიმის თქმით, მის ოჯახში ყველა ვაქცინირებულია, მშობლებიდან დაწყებული, ბავშვებით დამთავრებული. ამასთან, ყველამ გადაიტანა კორონავირუსი, მაგრამ დროული ვაქცინაციის წყალობით, 80 წლის მამის შემთხვევაშიც კი, რომელსაც ქრონიკული დაავადება აქვს, სტაციონარული მკურნალობა საჭირო არ გახდა.

რატიანმა აღნიშნა, რომ, რა თქმა უნდა, ვაქცინაციის გარდა საჭიროა გვახსოვდეს სხვა პროფილაქტიკური ზომებიც – პირბადე, სოციალური დისტანცია და პირადი ჰიგიენა.

მისი თქმით, პირბადის სწორად ტარება, შენობის განიავება და ზედაპირების სპეციალური ხსნარებით გაწმენდა დაეხმარა მას, რომ პაციენტებისგან კორონავირუსი არ გადასდებოდა.

„დღეში ათობით პაციენტს ვიღებთ. მათ შორის მოდიან მაღალი ტემპერატურით, ხველებით და კორონავირუსით უკვე ინფიცირებულები. პირბადე ყველას სწორად არ უკეთია. თამამად შემიძლია ვთქვა, რომ ის პროფილაქტიკური ზომები, რომლებსაც ორი წლის განმავლობაში მივმართავდი, დამეხმარა, რომ კორონავირუსი ჩემი პაციენტებისგან არ გადამდებოდა“, – აღნიშნა რატიანმა.

მისი თქმით, ვირუსი მას ოჯახის წევრებისგან გადაედო, მაგრამ რადგან ყველა ვაქცინირებული იყო, დაავადება პრაქტიკულად უსიმპტომოდ განვითარდა.

მიუხედავად პანდემიისა, ცხოვრება გრძელდება. ადამიანები ყოველდღიურად სარგებლობენ საზოგადოებრივი ტრანსპორტით, დადიან სამსახურში, პროფესიიდან გამომდინარე, ურთიერთობენ კლიენტებთან. ამიტომ პირბადის სწორად გამოყენება, ხელების ხშირი დაბანა და დეზინფექცია საუკეთესო საშუალებაა საკუთარი თავისა და ოჯახის წევრების დაცვისთვის ისე, რომ ყოველდღიური ცხოვრების რიტმიდან არ ამოვვარდეთ, აღნიშნა მაია რატიანმა.