თბილისი, 10 დეკემბერი – Sputnik. დღეისათვის საქართველოში 26 ათასი ადამიანია „ბუსტერ–დოზით“ აცრილი, განაცხადა დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ.
გამყრელიძის განმარტებით, მოქალაქეების მხრიდან კორონავირუსის საწინააღმდეგო ვაქცინის მესამე, ე.წ. ბუსტერ–დოზაზე მომართვიანობა თანდათან იმატებს. მისი თქმით, „ბუსტერს“ განსაკუთრებული მნიშვნელობა ენიჭება დღეს, როდესაც გაჩნდა ახალი „ომიკრონ“ შტამი.
მთავარი ეპიდემიოლოგის განცხადებით, ამ ეტაპზე ცნობილია, რომ „ომიკრონი“ უფრო სწრაფად ვრცელდება, ვიდრე მანამდე არსებული შტამები.
„გუშინ გამოქვეყნდა Pfizer-ის ინფორმაცია, რომელმაც პირველმა ჩაატარა კვლევა „ომიკრონ“ შტამთან ვაქცინის დამცველუნარიანობასთან დაკავშირებით, თუ რამდენად აქვს Pfizer-ის აცრის, განსაკუთრებით, „ბუსტერის“ გაკეთების შემდგომ გამომუშავებულ ანტისხეულებს მანეიტრალიზებელი თვისებები ახალი შტამის მიმართ. დადასტურდა, რომ დიახ, „ბუსტერი“ უნდა გაკეთდეს“, – განაცხადა გამყრელიძემ.
მისი თქმით, საქართველოში „ბუსტერ–დოზა“ ძირითადად Sinopharm-ის და Pfizer-ის ვაქცინებით კეთდება. თუმცა, მოსახლეობა უპირატესობას Pfizer-ს ანიჭებს.
ამავე დროს, როგორც გამყრელიძემ აღნიშნა, ქვეყანაში „ომიკრონ“ შტამით ინფიცირების შემთხვევა ჯერ არ დაფიქსირებულა.
7 დეკემბერს ჯანდაცვის სამინისტრომ ქვეყანაში კორონავირუსის საწინააღმდეგო ვაქცინის მესამე, ე.წ. ბუსტერ-დოზის გაკეთების ვადა ექვსიდან ხუთ თვემდე შეამცირა.
Pfizer-ის პრეპარატით ვაქცინირებული პირები „ბუსტერ-დოზის“ გაკეთებას მეორე აცრიდან ხუთი თვის შემდეგ შეძლებენ.
მათ კი, ვინც ვაქცინაცია ჩინური Sinovac-ით და Sinopharm-ით ჩაიტარა, მესამე ვაქცინის გაკეთება ბოლო აცრიდან სამი თვის შემდეგ შეუძლიათ.
ჯანდაცვის უწყებამ ასევე დააზუსტა 12–15 წლის მოზარდების ვაქცინაციის ვადები – პირველ და მეორე დოზებს შორის ინტერვალი 3-დან 12 კვირამდე განისაზღვრა.
რაც შეეხება პრეპარატ AstraZeneca-თი ვაქცინირებულ პირებს, ადრე გავრცელებული ინფორმაციით, მათთვის კორონავირუსის საწინააღმდეგო ვაქცინის მესამე დოზის გაკეთება მეორე აცრის ჩატარებიდან ექვსი თვის შემდეგ პრეპარატ Pfizer-ით არის დაშვებული.
ვაქცინის მეორე და მესამე დოზებს შორის ინტერვალის შემცირება ქვეყანაში კორონავირუსის ახალი „ომიკრონ“ შტამის გავრცელების საფრთხეებთან არის დაკავშირებული.