თბილისი, 9 დეკემბერი – Sputnik. საქართველოს დავით ყიფიანის სახელობის თასის ფინალში თბილისის „საბურთალომ“ წყალტუბოს „სამგურალი“ დაამარცხა და თასს უკვე მეორედ დაეუფლა.
ფინალური შეხვედრა ქუთაისში, რამაზ შენგელიას სახელობის სტადიონზე 8 დეკემბერს გაიმართა. თბილისელებმა მატჩი იური ტაბატაძის მიერ 65-ე წუთზე გატანილი გოლის წყალობით მოიგეს. „საბურთალოს“ ნახევარმცველმა შეხვედრის ერთადერთი გოლი ნიკა მალის ჩაწოდების შემდეგ თავური დარტყმით გაიტანა.
თბილისურმა კლუბმა ნახევარფინალურ ეტაპზე დაძაბულ ბრძოლაში ქვეყნის ჩემპიონ ბათუმის „დინამოსთან“ ანგარიშით 2:1 გაიმარჯვა. რაც შეეხება „სამგურალს“, წყალტუბოს ფეხბურთელებმა ფინალური ეტაპის საგზური ქობულეთის „შუქურასთან“ გამარჯვებით (3:2) მოიპოვეს.
აღნიშნული გამარჯვებით „საბურთალომ“ მომავალ წელს „კონფერენს ლიგის“ საკვალიფიკაციო ეტაპზე თამაშის უფლება მოიპოვა.
თბილისურმა კლუბმა არსებობის ისტორიაში უკვე მე-4 ტიტული მოიგო. „საბურთალო“ ერთხელ საქართველოს ჩემპიონი გახდა (2018), ერთხელ სუპერთასის (2020), ორჯერ კი საქართველოს თასის მფლობელია (2019, 2021).