თბილისი, 7 დეკემბერი – Sputnik. „მწვანე პასპორტის“ რეგულაციის დარღვევისთვის სანქციების გამოყენება ხუთი ობიექტის შემთხვევაში გახდა საჭირო, განაცხადა შრომის ინსპექციის სამსახურის უფროსმა ბექა ფერაძემ ტელეკომპანია „იმედის“ ეთერში.
საქართველოში 1 დეკემბრიდან ე.წ. „მწვანე პასპორტების“ კონცეფცია ამოქმედდა, რომლის თანახმად, კოვიდ-პასპორტის ან QR–კოდის წარდგენა აუცილებელი გახდა რიგ ობიექტებში: რესტორნებში (ღია და დახურულ სივრცეებში), კაფეებში (ღია და დახურულ სივრცეებში), ბარებში (ღია და დახურულ სივრცეებში), კინოთეატრებში, თეატრებში, ოპერაში, საკონცერტო დარბაზებში, გასართობ ცენტრებში, სამორინეებში, სათამაშო ბიზნესთან დაკავშირებულ დაწესებულებებში, სპა-ცენტრებში, ფიტნეს-დარბაზებში, სასტუმროებში, სამთო კურორტების საბაგირო გზებზე.
შრომის ინსპექცია სხვა ზედამხედველ ორგანოებთან ერთად მთელი ქვეყნის მასშტაბით ახორციელებს როგორც „მწვანე ზონების“ უსაფრთხო კონცეფციის მონიტორინგს, ასევე ზედამხედველობას უწევს აკრძალული სოციალური ღონისძიებების გამოვლენის ფაქტებს.
„შრომის ინსპექცია მთელი ქვეყნის მასშტაბით ატარებს მონიტორინგს. დაახლოებით 2 ათასამდე კომპანია შევისწავლეთ. პირველი ინსპექტირებები მეტწილად სარეკომენდაციო ხასიათის იყო. ობიექტების უმეტესობას სარეკომენდაციო ხასიათის მითითება მივეცით. თუმცა, სამწუხაროდ, ხუთი ობიექტის შემთხვევაში სანქციის გამოყენება მოგვიწია“, – განაცხადა ფერაძემ.
შრომის ინსპექციამ სხვადასხვა ობიექტებისთვის 41 საერთო და დარგობრივი რეკომენდაცია შეიმუშავა, რომელშიც გაწერილია, თუ როგორ უნდა განხორციელდეს მათი საქმიანობა კოვიდ-პასპორტების მოქმედების პირობებში.
„მწვანე სტატუსის" არმქონე პირების მომსახურებისთვის ბიზნეს-ობიექტები დაჯარიმებას ექვემდებარებიან. კერძოდ, თუ ისეთი ობიექტის ტერიტორიაზე, რომელიც „მწვანე ზონას" მიეკუთვნება, დაუშვებენ „მწვანე სტატუსის" არმქონე პირს, პასუხისმგებლობა დაწესებულების ადმინისტრაციას დაეკისრება.
კანონდარღვევის შემთხვევაში ობიექტის მფლობელი იურიდიული პირი 10 ათასი ლარით, ინდივიდუალური მეწარმე კი 2 ათასი ლარით დაჯარიმდება. ფაქტის განმეორების შემთხვევაში ობიექტი დაილუქება.