თბილისი, 2 დეკემბერი – Sputnik. გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა იმერეთსა და რაჭაში ორი უკანონო სახერხი საამქრო გამოავლინეს.
უწყების ცნობით, ე.წ. ლენტური ტიპის სახერხი დანადგარები ხარაგაულის მუნიციპალიტეტის სოფელ ღორეშას მიმდებარე ტყეში და ონის მუნიციპალიტეტის სოფელ ღარში, მდინარე ღარულას მიმდებარედ გამოავლინეს.
ხარაგაულში სახერხი საამქროს ტერიტორიაზე მოქალაქეს ასევე განთავსებული ჰქონდა 0,8 კუბური მეტრი წაბლის სახეობის პირველადი გადამუშავების პროდუქტი (ფიცარი).
როგორც უწყებაში აცხადებენ, აღნიშნული ფაქტები სისხლის სამართლის დანაშაულის ნიშნებს შეიცავს და მასალები შემდგომი რეაგირების მიზნით შესაბამის უწყებებში გადაიგზავნა.