თბილისი, 27 ნოემბერი - Sputnik. წინასწარი ინფორმაციით, გერმანიაში დაფიქსირდა კორონავირუსის ახალი შტამით - „ომიკრონით“ ინფიცირების პირველი შემთხვევა, განაცხადა ჰესენის მიწის სოციალური საკითხების მინისტრმა კაი კლოზემ. ამის შესახებ РИА Новости წერს.
„წუხელ სამხრეთ აფრიკიდან დაბრუნებულ ტურისტს აღმოაჩნდა ომიკრონისთვის დამახასიათებელი რამდენიმე მუტაცია. ეჭვები ძალიან სერიოზულია, ადამიანი უკვე იზოლაციაშია გადაყვანილი... გთხოვთ დაიცვათ საკუთარი თავი და გარშემომყოფები. თუ გასულ კვირას დაბრუნდით სამხრეთ აფრიკიდან, შეზღუდეთ თქვენი კონტაქტები და გაიარეთ ტესტირება!", - წერს პოლიტიკოსი Twitter-ზე.
ჩეხეთში კორონავირუსის ახალი სახეობით ინფიცირების შესაძლო პირველი შემთხვევის შესახებ ქვეყნის პრემიერ-მინისტრმა ანდრეი ბაბიშმა განაცხადა.
„ქალი, რომელსაც ტესტირება ჩაუტარდა კორონავირუსის ახალი შტამის - ომიკრონის არსებობაზე, იმყოფებოდა ნამიბიაში და დაბრუნდა ჩეხეთში სამხრეთ აფრიკის რესპუბლიკისა და არაბეთის გაერთიანებული საამიროების გავლით. ჩვენ ველოდებით მისი ტესტირების შედეგებს, ახლა ის იზოლირებულია, მისი ყველა კონტაქტი მოწმდება“, - განაცხადა მან.
„ომიკრონით“ ინფიცირების ორი შემთხვევა გამოვლინდა დიდ ბრიტანეთში - ამის შესახებ ქვეყნის ჯანდაცვის სამინისტროში განაცხადეს.
ადრე ბოტსვანასა და სამხრეთ აფრიკის რესპუბლიკაში გავრცელდა ინფორმაცია კორონავირუსის B.1.1.529-ის ახალი შტამის გამოვლენის შესახებ, რომელიც S-ცილის 32 მუტაციას შეიცავს. მკვლევარების აზრით, ბევრი მათგანი მიუთითებს ამ ვარიანტის მაღალ გადამდებობაზე და ვაქცინებისადმი მდგრადობაზე, მაგრამ საბოლოო დასკვნების გაკეთება ჯერ ნაადრევია.
ჯანდაცვის მსოფლიო ორგანიზაციამ (WHO) პარასკევს საგანგებო სხდომაზე აღიარა B.1.1.529 როგორც „შეშფოთების გამომწვევი" და მიანიჭა მას სახელწოდება „ომიკრონი", ბერძნული ანბანის მე-15 ასოს მიხედვით.
ევროკავშირი შეთანხმდა, რომ სამხრეთ აფრიკის შვიდი სახელმწიფოდან შესვლაზე შეზღუდვები უნდა დაწესდეს. აშშ-ის პრეზიდენტმა ჯო ბაიდენმა დაადასტურა, რომ შეერთებული შტატები 29 ნოემბრიდან ასევე შეზღუდავს საჰაერო მიმოსვლას აფრიკის ზოგიერთ ქვეყანასთან, მათ შორის სამხრეთ აფრიკის რესპუბლიკასთან. მსგავსი გადაწყვეტილებები მიიღეს ტაილანდის, ბრაზილიის, კანადის, იაპონიის და შრი-ლანკის ხელისუფლებამ.