თბილისი, 25 ნოემბერი — Sputnik. ბათუმის საკრებულოს ოპოზიციონერი დეპუტატის ნუგზარ ფუტკარაძის გარდაცვალების საქმეზე პოლიციაში მოწმეების გამოკითხვა მიმდინარეობს.
როგორც ტელეკომპანია „იმედი“ შსს–ზე დაყრდნობით იუწყება, სისხლის სამართლის საქმე 116-ე მუხლის პირველი ნაწილით დაიწყო, რაც გაუფრთხილებლობით სიცოცხლის მოსპობას გულისხმობს.
ოფიციალური ვერსიით, ფუტკარაძე გულის შეტევით გარდაიცვალა.
ამ დროისთვის აღნიშნულ საქმესთან დაკავშირებით გამოკითხვაზე „ნაცმოძრაობის“ წევრები გიორგი კირთაძე, მირდატ ქამადაძე და ელგუჯა ბაგრატიონი იმყოფებიან.
როგორც კირთაძემ გამოკითხვის დაწყებამდე განაცხადა, იგი არ ენდობა გამოძიებას, თუმცა მას წარუდგენს ფუტკარაძის კონკრეტულ პირებთან შეხვედრის ამსახველ ვიდეოჩანაწერს, რომლებიც ზეწოლის გზით ოპოზიციონერი დეპუტატის გადაბირებას ცდილობდნენ.
როგორც გუშინ გამართულ ბრიფინგზე კირთაძემ განაცხადა, მისი ინფორმაციით, აჭარის მთავრობის თავმჯდომარის თორნიკე რიჟვაძის მამის დავით რიჟვაძის დავალებით ფუტკარაძესთან მოლაპარაკებებს აწარმოებდნენ ბათუმის ყოფილი მეთაურის ასლან აბაშიძის მმართველობის დროინდელი ძალოვანი ჩინოვნიკები ვაჟა თაბაგიძე და ბადრი ბაკურიძე, რომლებიც მას 100 ათას დოლარს სთავაზობდნენ გადაბირების სანაცვლოდ. ისინი ფუტკარაძემ „ნაცმოძრაობის“ დატოვებას და „ქართულ ოცნებაში“ გადასვლას სთხოვდნენ.
როგორც „ნაცმოძრაობაში“ აცხადებენ, სწორედ „ქართული ოცნების“ მიერ დეპუტატზე განხორციელებულმა ზეწოლამ გამოიწვია ფუტკარაძის გარდაცვალება.
თვითმმართველობის არჩევნების შედეგებით, ბათუმის საკრებულოში „ქართულ ოცნებას“ და ჯამურად ოპოზიციას 17–17 დეპუტატი ჰყავს.
ნუგზარ ფუტკარაძე, რომელიც №4 მაჟორიტარულ ოლქში იყრიდა კენჭს და თვითმმართველობის არჩევნებში პირველივე ტურში გაიმარჯვა, გასულ კვირაში გარდაიცვალა.
ფუტკარაძის გარდაცვალების შემდეგ ბათუმის საკრებულოში „ნაციონალურ მოძრაობას“ 14 დეპუტატი, „ქართულ ოცნებას“ – 16, „ლელო საქართველოსთვის“ – 1, ექს-პრემიერ გიორგი გახარიას პარტიას „საქართველოსთვის“ კი 2 დეპუტატი ჰყავს. საკრებულოს კიდევ ერთი წევრია გახარიას ყოფილი თანაპარტიელი, რომელმაც პარტია არჩევნების პირველი ტურის შემდეგ დატოვა და „ოცნებას“ შეუერთდა.