თბილისი, 24 ნოემბერი − Sputnik. ოთხთვალა და ორდრუნჩა ხბო, რომელიც ინდოეთის ქალაქ ინდორში დაიბადა, მოსახლეობის თაყვანისცემის ობიექტად იქცა, იუწყება The Mirror.
გავრცელებული ინფორმაციით, უნიკალურ ცხოველს, რომელიც ადგილობრივებმა „ღვთაებრივად“ შერაცხეს, აქვს ორი შეზრდილი თავის ქალა, ოთხი თვალი, ორი დრუნჩი და ორი ყური. ხბოს რძის სმა ერთდროულად ორივე პირით შეუძლია და ამასთან სრულიად ჯანმრთელად მიიჩნევა.
უჩვეულო ცხოველმა მყის მიიპყრო ინდორის მოსახლეობის ყურადღება. ხალხმა ჯგუფებად იწყო სვლა „ღვთაებრივი ძროხის“ მფლობელი ფერმერის სახლში, რათა თაყვანი სცენ და სურათი გადაიღონ ხბოსთან.
ამასთან ინტერნეტით ვრცელდება თვითმხილველის მიერ გადაღებული ვიდეო, რომელზეც ჩანს, როგორ ცდილობს ხბო, აკანკალებული ფეხებით გაიაროს.
ირკვევა ისიც, რომ ხბოს ძალიან უყვარს მოფერება და თავის პატრონთან ჩახუტება.
აღსანიშნავია, რომ ეს პირველი შემთხვევა არ არის, როდესაც ინდოეთში უცნაური ცხოველი იბადება და მოსახლეობის თაყვანისცემის ობიექტი ხდება.