თბილისი, 19 ნოემბერი – Sputnik. საქართველოში ჰოსპიტალიზებული კოვიდ-პაციენტების სამკურნალოდ ანტივირუსული მედიკამენტების, ე.წ. მონოკლონური ანტისხეულების დამატებითი დოზები ჩამოვიდა, ნათქვამია ჯანდაცვის სამინისტროს მიერ გავრცელებულ ინფორმაციაში.
ინდური ფარმაცევტული კომპანია Hetero Biopharma Limited-ის მიერ წარმოებული 2 ათასი დოზა „ტოცილიზუმაბი“ და Roche-ს მონოკლონური ანტისხეულები – 500 დოზა „რონაპრივი“ (კასირივიმაბი/იმდევიმაბი) სამედიცინო დაწესებულებებში ეტაპობრივად განაწილდება.
უწყების ცნობით, აღნიშნული მედიკამენტების შესყიდვა ჯანდაცვის სამინისტროს მიერ მსოფლიო ბანკის „COVID-19-ის წინააღმდეგ სწრაფი რეაგირების პროექტის“ დამატებითი დაფინასების ფარგლებში განხორციელდა.
აღნიშნული პრეპარატები აქტიურად გამოიყენება COVID-19-ით ინფიცირებული მძიმე და კრიტიკულად მძიმე პაციენტების სამკურნალოდ.
მანამდე ორი ანტივირუსული მედიკამენტი „კასირივიმაბი“ და „იმდევიმაბი“ საქართველოს გერმანიის მთავრობამ გადმოსცა.
მონოკლონური ანტისხეულების გამოყენება მოხდება იმ პაციენტების შემთხვევაში, რომელთაც სხვა პაციენტებთან შედარებით დამძიმების უფრო მაღალი რისკი აქვთ. ესაა 65 წელს ზემოთ პირები, თანმხლები დაავადებების, შაქრიანი დიაბეტის, ჭარბი წონის მქონე ადამიანები.
ე.წ. მონოკლონური ანტისხეულები იმუნური სისტემის ერთ-ერთი საშუალებაა – ორგანიზმში უცხო ნივთიერებებს ანტისხეულების გამოყენებით შეუტიოს.
მონოკლონურ ანტისხეულებს სხვადასხვა დაავადების დროს იყენებენ. ეს ანტისხეულები აბსოლუტური სიზუსტით იღებენ სამიზნეს და ანადგურებენ მას. კორონავირუსის საწინააღმდეგო მონოკლონური ანტისხეულები უკვე შექმნილია და მისი მიზანია ადამიანის ორგანიზმში მოხვედრილი ვირუსის ნეიტრალიზება. ამ ანტისხეულების გამოცდა აშშ-სა და კიდევ რამდენიმე ქვეყანაში დაიწყო. საქართველო კლინიკური ცდების მონაწილე ქვეყნების სიაში ამერიკელი მეცნიერის, იმუნოლოგისა და ინფექციონისტის ენტონი ფაუჩის პირდაპირი რეკომენდაციით მოხვდა.