თბილისი, 18 ნოემბერი – Sputnik. ლიეტუვის მთავრობა საქართველოს Pfizer-ის ვაქცინის 50.310 დოზას უანგაროდ გადასცემს, იუწყება ქვეყნის საელჩო საქართველოში.
„ლიეტუვა განაგრძობს პარტნიორი ქვეყნების მხარდაჭერას COVID-19-ის პანდემიასთან ბრძოლაში, რომლის ფარგლებში საქართველოს ივლისში გადაეცა AstraZeneca-ს ვაქცინის 15 ათასი დოზა“, – აღნიშნულია განცხადებაში.
როგორც განცხადებაშია ნათქვამი, ქვეყანამ საქართველოს, უკრაინას, მოლდოვას, სომხეთსა და ტაივანს მთლიანობაში 455.900 დოზა AstraZeneca-ს ვაქცინა გადასცა, კიდევ 60 ათასი – ტაჯიკეთს.
საქართველოს ჯანდაცვის სამინისტროსთან არსებულმა იმუნიზაციის საბჭომ 9 ნოემბერს 12–15 წლის მოზარდების Pfizer-ის ვაქცინით აცრის გადაწყვეტილება მიიღო. სავალდებულო მოთხოვნაა მშობლების ან მეურვეების თანხმობა.
ამჟამად საქართველოში ვაქცინაციის სრული კურსი ჩატარებული აქვს ზრდასრული მოსახლეობის 34%-ს.
საქართველოს ხელისუფლება კორონავირუსის პანდემიასთან ბრძოლისთვის 2022 წელს 500 მლნ ლარის დახარჯვას აპირებს.