თბილისი, 17 ნოემბერი — Sputnik. ამერიკულმა ფარმაცევტულმა კომპანია Pfizer-მა მოთხოვნა გაუგზავნა აშშ-ის სურსათისა და წამლების სააგენტოს (FDA) COVID-19-ის სამკურნალო ექსპერიმენტული წამლის დამტკიცების შესახებ.
„Pfizer-მა დღეს გამოაცხადა, რომ სურს ავტორიზაცია მიიღოს თავის ექსპერიმენტულ პერორალურ ანტივირუსულ პრეპარატ PAXLOVID™-ზე, რომელიც მსუბუქი და საშუალო სიმძიმის COVID-19-ის სამკურნალოდ გამოიყენება ჰოსპიტალიზაციისა თუ სიკვდილის მაღალი რისკის მქონე პაციენტებში“, — ნათქვამია კომპანიის პრეს-რელიზში.
აღინიშნება, რომ თუ სააგენტო PAXLOVID-ს ავტორიზაციას მიანიჭებს, ის პირველი პრეპარატი გახდება, რომელიც კორონავირუსული დაავადების სამკურნალოდ აბების სახით იქნება გამოყენებული.
როგორც დოკუმენტშია ნათქვამი, პრეპარატი კორონავირუსული ინფექციის პირველი ნიშნების გამოვლენისთანავე შეიძლება დაენიშნოს მაღალი რისკის ჯგუფში შემავალ პაციენტს შინ, სახლის პირობებში სამკურნალოდ, რაც პოტენციურად დაეხმარება ავადმყოფს, თავიდან აიცილოს მძიმე COVID-19, ასევე შემდგომი ჰოსპიტალიზაცია თუ სიკვდილი.
„მსოფლიოში 5 მილიონზე მეტი სიკვდილისა და ამ დამანგრეველი დაავადებით დაზარალებული უთვალავი სიცოცხლის გათვალისწინებით, არსებობს სიცოცხლის გადამრჩენი მკურნალობის ვარიანტების გადაუდებელი საჭიროება. PAXLOVID-მა აბსოლუტური ეფექტურობა გამოავლინა ჩვენს ბოლო კლინიკურ კვლევაში. მას აქვს პოტენციალი, დაეხმაროს სიცოცხლის გადარჩენას და აღკვეთოს ადამიანების საავადმყოფოში მოხვედრა, თუ მისი გამოყენება ნებადართული იქნება“, — განაცხადა Pfizer-ის დირექტორმა ალბერტ ბურლამ.
როგორც პრეს-რელიზშია ნათქვამი, Pfizer-მა აღნიშნული პრეპარატი წინასწარი კლინიკური კვლევებისას COVID-19-ის დიაგნოზის მქონე 18 წლისა და უფროსი ასაკის პაციენტებზე გამოსცადა, რომლებიც დაავადების მძიმე ფორმის რისკის ქვეშ იყვნენ. კვლევის მონაცემების თანახმად, PAXLOVID-მა 89%-ით შეამცირა ჰოსპიტალიზაციისა თუ ლეტალური შედეგის რისკი.
მანამდე ცნობილი გახდა, რომ Pfizer-მა ხელი მოაწერა წამლების საპატენტო პულთან (Meds Pal) შეთანხმებას, რომელიც მსოფლიოს სხვა ფარმაცევტულ კომპანიებს მის მიერ შექმნილი ანტიკორონავირუსული ექსპერიმენტული წამლის წარმოების უფლებას ანიჭებს.