თბილისი, 15 ნოემბერი - Sputnik. საპილოტე რეგიონების ინტეგრირებული განვითარების პროგრამის ფარგლებში, 7 მუნიციპალიტეტში განსახორციელებელი პროექტები 4 მილიონი ლარით დაფინანსდება, ამის შესახებ საუბარია რეგიონული განვითარებისა და ინფრასტრუქტურის სამინისტროს განცხადებაში.
ურბანული განახლების, ტურიზმისა და ბიზნესის განვითარების მიზნობრივი პროექტები 2021-2022 წლებში განხორციელდება ლაგოდეხის, თელავის, ქუთაისის, ხარაგაულის, ლანჩხუთის, წყალტუბოსა და ჭიათურის მუნიციპალიტეტებში, რისთვისაც პროგრამის ფარგლებში მუნიციპალიტეტებს ჯამში გადაეცემათ თითქმის 3,8 მლნ ლარი, ხოლო მუნიციპალიტეტების თანადაფინანსება 42 ათას ლარამდე თანხას შეადგენს.
დასაფინანსებელი პროექტები შეირჩა უშუალოდ მუნიციპალიტეტების ინიციატივითა და პროგრამის ფარგლებში გამოცხადებული კონკურსების საფუძველზე.
რისთვის დაიხარჯება თანხა:
ადგილობრივი ბიზნესის განვითარების ხელშესაწყობად ლაგოდეხის მუნიციპალიტეტის სოფელ რაჭისუბანში მოწესრიგდება საგზაო ინფრასტრუქტურა;
კულტურული და საგანმანათლებლო როლის გაძლიერებისთვის ქალაქ თელავში ისტორიულ ძეგლებსა და ტურისტულ საინფორმაციო დაფებზე განთავსება QR კოდები;
ქუთაისში ილია ჭავჭავაძის გამზირზე (მოსწავლე ახალგზარდობის სასახლის მიმდებარედ) აშენდება საავტომობილო მოძრაობის უსაფრთხოების მარეგულირებელი ინფრასტრუქტურა;
წყალტუბოში, „ცივი ტბის“ მიმდებარე ტერიტორიაზე გაუმჯობესდება არსებული ინფრასტრუქტურა და მოეწყობა სანიტარული წერტილები;
ჭიათურაში, ყაზბეგის ქუჩაზე კეთილმოეწყობა ტბის მიმდებარე ტერიტორია;
ხარაგაულის მუნიციპალიტეტში განახლდება სოფელ ხუნევის საბავშვო ბაღი;
ლაჩხუთის მუნიციპალიტეტის სოფელ ორაგვეში კი მოეწყობა ტურისტული ინფრასტრუქტურა და განახლდება მისასვლელი გზა.
ევროკავშირის მიერ დაფინანსებული 2020-2022 წლების საპილოტე რეგიონების ინტეგრირებული განვითარების პროგრამა გულისხმობს მიზნობრივი ღონისძიებების დაფინანსებას საქართველოს ოთხ საპილოტე რეგიონში - კახეთი, იმერეთი, გურია და რაჭა-ლეჩხუმი-ქვემო სვანეთი. პროგრამის მიზანია სახელმწიფო სერვისების ხარისხის გაუმჯობესება და მათთან წვდომის გაზრდა, სიღარიბის შემცირება და, საბოლოო ჯამში, სოციალური და ეკონომიკური უთანასწორობის თანდათანობით აღმოფხვრა თბილისსა და საპილოტე რეგიონებს შორის.
საპილოტე რეგიონების პროგრამა შეიქმნა ევროკავშირის ექსპერტების მონაწილეობით და ზოგადი ხედვა ეფუძნება ევროკავშირის რეგიონული განვითარების პოლიტიკის უახლეს მიდგომებს.
პროგრამა საქართველოს მთავრობამ 2019 წლის 20 დეკემბერს დაამტკიცა. საპილოტე რეგიონების ინტეგრირებული განვითარების პროგრამის ფარგლებში, საპილოტე 4 რეგიონის მუნიციპალიტეტებისთვის დღეისათვის უკვე გამოყოფილია 48 მილიონ ლარამდე.წინასწარი ბიუჯეტი 200 მლნ ლარს შეადგენს.