თბილისი, 13 ნოემბერი- Sputnik. რუსთავში ქალს ქმრის ცემის გამო შემაკავებელი ორდერი გამოუწერეს, იუწყება ქართული მედია.
ქალს ჰქონდა დედასთან კონფლიქტი, რომელშიც ჩაერია ქმარი. ამის გამო ქალმა ის სცემა. მომხდარის შემდეგ მამაკაცმა მიმართა პოლიციას, რომელმაც ქალს მეუღლესთან მიახლოება აუკრძალა.
თავად ქალი ძალადობის ფაქტს არ უარყოფს. მისი თქმით, მის ქმარს დაზიანებები აქვს.
„დიახ, გავუსწორდი ფიზიკურად, არაერთხელ გავსწორებივარ. რაც არ მეკადრება ისეთ რამეს რომ მაკადრებენ, ქალი, კაცი, ბიჭი, არ აქვს მნიშვნელობა, ყველას გავუსწორდები“, - განუცხადა ჟურნალისტებს ქალმა.
მისი სახელი და გვარი საქმის თავისებურების გამო არ სახელდება.
ქალის თქმით, ქმარს ის ბევრჯერ უცემია, მაგრამ მას ამის გამო პოლიციისთვის არ მიუმართავს.
ძალადობის ფაქტი რუსთავში 8 ნოემბერს მოხდა.
ეს არ არის პირველი შემთხვევა, როდესაც საქართველოში ქალს ოჯახური ძალადობის გამო შემაკავებელი ორდერი აქვს გამოწერილი. მიმდინარე წლის 1 იანვრიდან 30 სექტემბრამდე ოჯახური ძალადობისთვის შემაკავებელი ორდერი 1,1 ათას ქალს გამოუწერეს.