თბილისი, 11 ნოემბერი — Sputnik. სასამართლო პროცესი ე.წ. პიჯაკების საქმეზე, რომელშიც ბრალდებულია საქართველოს ექს-პრეზიდენტი მიხეილ სააკაშვილი, თბილისის საქალაქო სასამართლოში 15 ნოემბერს დაინიშნა.
საქმე ეხება მიხეილ სააკაშვილის მიერ მისი პრეზიდენტობის პერიოდში ფუფუნების საგნებზე არამიზნობრივ საბიუჯეტო ხარჯებს. საბიუჯეტო სახსრების ხარჯების გრძელ სიაშია ლონდონში შეძენილი 28,6 ათასი დოლარის ღირებულების პიჯაკი და ქაშმირის პალტო, ასევე სხვა ძვირადღირებული ტანსაცმელი.
როგორც ჟურნალისტებს სააკაშვილის ადვოკატმა ბექა ბასილაიამ განუცხადა, დაცვა კვლავ მოითხოვს ბრალდებულის დასწრებას სასამართლო პროცესზე.
„ჩვენ ვითხოვდით და ვითხოვთ მიხეილ სააკაშვილის პროცესებზე დასწრებას, თუმცა 15 ნოემბრისთვის როგორი იქნება მისი ჯანმრთელობის მდგომარეობა, წინასწარ თქმა გამიჭირდება. თუ ჯანმრთელობის მდგომარეობა ამის შესაძლებლობას მისცემს, რა თქმა უნდა, გვინდა, რომ მიხეილ სააკაშვილი პროცესს დაესწროს", – განაცხადა ბასილაიამ.
„პიჯაკების საქმე" უკვე მეორე საქმეა სააკაშვილის წინააღმდეგ, რომელზეც სასამართლო მოსმენა განახლდება. 10 ნოემბერს თბილისის საქალაქო სასამართლოში უკვე გაიმართა 2007 წლის 7 ნოემბრის აქციის დარბევის საქმეზე პროცესი. დაცვის მხარე ბრალდებულის დასწრებას მოითხოვდა, თუმცა ციხის ადმინისტრაციამ უარი თქვა სააკაშვილის სასამართლოში მიყვანაზე, რადგან, როგორც უწყებაში განმარტეს, ეტაპირების დროს პროვოკაციების საშიშროება არსებობდა.
როგორც იუსტიციის მინისტრმა რატი ბრეგაძემ განაცხადა, სააკაშვილი სასამართლოში არ მიიყვანეს პროვოკაციებისა და მის ჯანმრთელობასთან დაკავშირებული რისკების თავიდან ასაცილებლად.
მიხეილ სააკაშვილი 1 ოქტომბრიდან, მისი დაკავების დღიდან შიმშილობს.