თბილისი, 5 ნოემბერი – Sputnik. გორის მე-3 საჯარო სკოლას კორონავირუსის პრევენციისთვის საჭირო საშუალებები, მათ შორის 140 ტონა სადეზინფექციო ხსნარი საჩუქრად გადაეცა. ინფორმაციას განათლების სამინისტრო ავრცელებს.
სკოლას სადეზინფექციო ხსნარი საქართველოს განათლებისა და მეცნიერების მინისტრის პირველმა მოადგილემ ეკატერინე დგებუაძემ გადასცა იაპონიის სრულუფლებიან ელჩთან იმამურა აკირასთან და საქართველოში გაეროს ბავშვთა ფონდის წარმომადგენელ ღასან ხალილთან ერთად.
როგორც სამინისტროში განმარტავენ, აღნიშნული საჩუქარი დამატებითი მხარდაჭერაა დონორი ორგანიზაციის მხრიდან, რაც პანდემიის მართვის პროცესში განსაკუთრებით მნიშვნელოვანია.
ეკატერინე დგებუაძემ იაპონიის ელჩსა და გაეროს ბავშვთა ფონდის წარმომადგენელს ხელშეწყობისთვის მადლობა გადაუხადა და აღნიშნა, რომ UNICEF-ი სამინისტროს ერთ-ერთი უმთავრესი პარტნიორი ორგანიზაციაა, რომელიც პანდემიის დაწყებიდან აქტიურად არის ჩართული სკოლებში ვირუსის პრევენციისთვის საჭირო ღონისძიებებში.
განათლების სამინისტროს ინფორმაციით, სხვადასხვა დროს კოვიდ-ვაქცინაციასთან დაკავშირებით UNICEF-ის მიერ ორგანიზებულ საინფორმაციო შეხვედრებს მთელი საქართველოს მასშტაბით 3 ათასამდე პედაგოგი დაესწრო.
რთული ეპიდსიტუაციის გამო საქართველოს მასშტაბით საჯარო სკოლებმა, პროფესიულმა სასწავლებლებმა და უმაღლესმა საგანმანათლებლო დაწესებულებებმა 15 სექტემბერს სწავლა დისტანციურ რეჟიმში დაიწყეს, 4 ოქტომბრიდან კი სწავლა საკლასო ოთახებსა და აუდიტორიებში განახლდა.
ამ დროისთვის ქვეყნის მასშტაბით კორონავირუსის შემთხვევების გამო დისტანციურ სწავლებაზე 200-ზე მეტი სკოლა და 700-ზე მეტი ცალკეული კლასია გადასული.