თბილისი, 4 ნოემბერი − Sputnik. გერმანია, დიდი ალბათობით, მიმდინარე წლის ბოლომდე ვერ მიიღებს გაზს „ჩრდილოეთის ნაკადი-2“-ის გავლით, განაცხადა ბუნდესტაგის ენერგეტიკული კომიტეტის ხელმძღვანელმა კლაუს ერნსტმა.
„ის ფაქტი, რომ ეკონომიკის ფედერალური სამინისტრო მივიდა დასკვნამდე – „დარწმუნებული არ ვარ, რომ გერმანია ამ წლის ბოლომდე მიიღებს საწვავს გაზსადენ „ჩრდილოეთის ნაკადი-2“-ით“, ამას ორი მიზეზი აქვს: ფედერალურმა ქსელურმა სააგენტომ (BNetzA) 2022 წლის იანვრამდე უნდა გადაჭრას პროექტის სერტიფიკაციის საკითხი, რის შემდეგაც ევროკომისიას კიდევ ოთხი თვე აქვს იმისთვის, რომ თავისი ვერდიქტი გამოიტანოს“, − აღნიშნა დეპუტატმა.
ამასთან BnetzA-ში ხაზს უსვამენ, რომ ევროკომისიას არ აქვს ვეტოს დადების უფლება, მაგრამ სააგენტომ „მაქსიმალურად უნდა გაითვალისწინოს ევროკომისიის მოსაზრება“.
კლაუს ერნსტის თქმით, ევროპაში ენერგეტიკულ კრიზისს არ შეუცვლია იმ პოლიტიკოსთა ნაწილის აზრი, რომლებიც კრიტიკულად ეკიდებიან პროექტს. დეპუტატს მიაჩნია, რომ ევროპის ენერგეტიკული პოლიტიკა კვლავაც სხვადასხვა ჯგუფების ინტერესების გათვალისწინებით ყალიბდება, რის გამოც ერთიანი მიდგომის შემუშავება შეუძლებელი ხდება.
მანამდე სააგენტო Bloomberg წერდა, რომ გაზსადენ „ჩრდილოეთის ნაკადი-2“-ის ექსპლუატაციაში გაშვება შესაძლოა მომავალი წლის მაისამდე გაიწელოს.