თბილისი, 31 ოქტომბერი – Sputnik. თბილისში მუნიციპალური ტრანსპორტის მოძრაობის შესაძლო შეზღუდვის შესახებ გავრცელებული ინფორმაცია სიმართლეს არ შეესაბამება, აღნიშნულია საქართველოს მთავრობის სტრატეგიული კომუნიკაციების დეპარტამენტის მიერ გავრცელებულ განცხადებაში.
უწყების განცხადებით, შაბათს რამდენიმე ონლაინ-პორტალმა გაავრცელა მცდარი ინფორმაცია თბილისში მუნიციპალური ტრანსპორტის მოძრაობის შესაძლო შეზღუდვის შესახებ.
„ხაზგასმით ვაცხადებთ, აღნიშნული ინფორმაცია არის კლასიკური ფეიკ-ნიუსი და სიმართლეს არ შეესაბამება. ნებისმიერი შეზღუდვის დაწესებისა თუ შემსუბუქების შესახებ გადაწყვეტილებებს უწყებათაშორისი საკოორდინაციო საბჭო ეპიდვითარებიდან გამომდინარე იღებს. საბჭოს სხდომები პრემიერ-მინისტრ ირაკლი ღარიბაშვილის ხელმძღვანელობით, ყოველკვირეულად იმართება და მიღებული გადაწყვეტილებების შესახებ საზოგადოებას ინფორმაცია პროაქტიულად მიეწოდება“, – ნათქვამია განცხადებაში.
კორონავირუსის გავრცელების პრევენციის მიზნით შეზღუდვების დაწესების საჭიროებას ვერ ხედავენ ვერც ჯანდაცვის სამინისტროში.
„ახალი კორონავირუსის გავრცელების პრევენციის მიზნით დამატებითი შეზღუდვების დაწესების აუცილებლობა ამ ეტაპზე არ განიხილება“, - განაცხადა ჯანდაცვის მინისტრმა ეკატერინე ტიკარაძემ
მინისტრის თქმით, ამ ეტაპზე შემთხვევების საშუალო დღიური მაჩვენებელი 4 ათასის ფარგლებშია და სწრაფი ზრდის ტენდენციები არ იკვეთება.
„დამატებითი შეზღუდვების დაწესების აუცილებლობა ამ ეტაპზე არ განიხილება. თუ ვინმე ავრცელებს, რომ დამატებითი შეზღუდვების დაწესება იგეგმება, ეს არის ტყუილი და მოსახლეობის შეცდომაში შეყვანას ემსახურება. როგორც ჩანს, ამას გარკვეული ჯგუფები მიზანმიმართულად აკეთებენ“, – განაცხადა ტიკარაძემ.
აღნიშნული გადაწყვეტილება დღეს თბილისის მერიაშიც უარყვეს.
ინფორმაცია იმის შესახებ, რომ მომავალი კვირიდან თბილისში ავტობუსების და სამარშრუტო ტაქსების მუშაობა შეიზღუდება, სოციალურ ქსელებში შაბათს გავრცელდა და აქტიურად განიხილება.