თბილისი, 28 ოქტომბერი — Sputnik. ქართველი ჩოგბურთელი მარიამ ბოლქვაძე საფრანგეთის ქალაქ პუაიტეში მიმდინარე საერთაშორისო ტურნირზე მეოთხედფინალის ეტაპზე გავიდა.
23 წლის ქართველი ჩოგბურთელი, რომელიც მსოფლიო რეიტინგში 183-ე პოზიციაზეა, მერვედფინალურ მატჩში მასპინძელ ჯესიკა პონჩეს დაუპირისპირდა და დაძაბულ სამსეტიან ბრძოლაში ანგარიშით 3:6, 7:6, 6:2 სძლია. მანამდე ბოლქვაძემ ასევე ფრანგი ლეოლია ჟინჟინი მარტივად დაამარცხა (6:1, 6:4).
ქართველ ჩოგბურთელს შემდეგ ეტაპზეც ფრანგ სპორტსმენთან მოუწევს შეხვედრა, ბოლქვაძე ქლოე პაკესა და ალის რობეს შორის გამარჯვებულს დაუპირისპირდება.
აღსანიშნავია, რომ ბოლქვაძე ფრანგულ ტურნირზე წყვილთა თანრიგშიც თამაშობს. მარიამმა და ბრიტანელმა სამანტა მარიმ გერმანელი ანა გაბრიჩი და რუმინელი არინა ვასილესკუ 6:2, 6:7, 10:6 დაამარცხეს. ქართველისა და ბრიტანელის დუეტი მეოთხედფინალში ფრანგ ესტელ კასკინოსა და იტალიელ კამილა როსატელოს წყვილს გაეჯიბრება.