თბილისი, 25 ოქტომბერი — Sputnik. ჰოსპიტალური სექტორი გადატვირთულია, რასაც მედიკოსები ქვეყანაში ვაქცინაციის დაბალი დონით ხსნიან.
ბოლო მონაცემებით, საქართველოში კორონავირუსის 48.757 აქტიური შემთხვევაა, მათგან 6.166 ადამიანი სტაციონარში გადის მკურნალობას.
„ჩვენი კლინიკა აბსოლუტურად გადატვირთულია. ადგილები არ არის არც ბავშვებისთვის, არც დიდებისთვის. პრაქტიკულად არცერთ პაციენტზე არ შემიძლია ვთქვა, რომ იგი არის საშუალო სიმძიმის - ყველა არის ჟანგბადდამოკიდებული. დადგება დრო, როცა საწოლებიც აღარ გვეყოფა და პაციენტების მიღებას ვეღარ შევძლებთ", - განაცხადა ვახტანგ ბოჭორიშვილის სახელობის კლინიკის ინფექციური დეპარტამენტის ხელმძღვანელმა ლია გოლიაძემ.
რთული ვითარებაა ციციშვილის სახელობის ბავშვთა საავადმყოფოში. კლინიკის დირექტორის დავით რეხვიაშვილის თქმით, კორონავირუსით ინფიცირებულ პაციენტთა მიმართვიანობა კვლავ მაღალი რჩება.
„კლინიკაში ახლა 108 პაციენტი მკურნალობს. მომართვიანობა მაღალია, თუმცა, მთავარია რომ არ ფიქსირდება ზრდის ტენდენცია. რაც შეეხება პაციენტების მდგომარეობას, კრიტიკულად მწვავე სიტუაცია არცერთთან არ გვაქვს", - განაცხადა რეხვიაშვილმა.
მისი თქმით, ციციშვილის კლინიკაში 51 ინფიცირებული მშობელი მკურნალობს და მათ შორის ვაქცინირებული არცერთი არ არის.
ბოლო მონაცემებით, საქართველოში კორონავირუსით ინფიცირებულთა რაოდენობამ 694 ათასს გადააჭარბა, გამოჯანმრთელდა 635 ათასზე მეტი, გარდაიცვალა 9,788 ადამიანი.