თბილისი, 24 ოქტომბერი – Sputnik. უზბეკეთის პრეზიდენტის არჩევნები შედგა - ადგილობრივი დროით 11:00 საათზე ამომრჩეველთა აქტივობამ 33%-ს გადააჭარბა, განაცხადა ქვეყნის ცესკოს თავმჯდომარის მოადგილე ბახრომ კუჩკაროვმა, იუწყება Sputnik-უზბეკეთი.
„ელექტრონული სისტემის მონაცემებით, რომელიც ამომრჩეველთა აქტივობას აფიქსირებს, 11:00 საათისთვის საარჩევნო უბნებზე 6.669.552 ამომრჩეველი - საერთო სიის 33,6% - გამოცხადდა“, - განაცხადა კუჩკაროვმა.
შედარებისთვის, 2016 წლის საპრეზიდენტო არჩევნებზე დილის 11:00 საათზე აქტივობამ 33,73% შეადგინა.
უზბეკეთში მოქმედი კანონმდებლობით, იმისათვის, რომ არჩევნები შემდგარად აღიარონ, კენჭისყრაში მონაწილეობა რეგისტრირებული ამომრჩევლების 33%-მა უნდა მიიღოს.
უზბეკეთის ცესკოს მონაცემებით, ამომრჩეველთა სიაშია დაახლოებით 19,86 მილიონი ადამიანი, გახსნილია 10.760 საარჩევნო უბანი.
უზბეკეთის მოქალაქეებს კენჭისყრაში მონაწილეობა უცხოეთშიც შეუძლიათ: 49 ქვეყანაში შეიქმნა 55 სტაციონარული და 316 მოძრავი საარჩევნო უბანი.
საარჩევნო უბნები ადგილობრივი დროით 20:00 საათზე დაიხურება.
არჩევნების წინასწარი შედეგები ორშაბათს დღის პირველ ნახევარში იქნება ცნობილი.