თბილისი, 22 ოქტომბერი — Sputnik. ქვეყანაში ბოლო პერიოდში ინფიცირებულთა რაოდენობამ მოიმატა, პრევენციისთვის კი ერთადერთი გზა ვაქცინაციაა, განაცხადა საქართველოს პრემიერ-მინისტრმა ირაკლი ღარიბაშვილმა ჟურნალისტებთან.
ღარიბაშვილის თქმით, ქვეყანაში ვაქციანიაციასთან დაკავშირებით ვრცელდება ცრუ ინფორმაცია. მან მოუწოდა მოსახლეობას, არ დაუჯერონ აღნიშნულ ინფორმაციას, ვინაიდან ვაქცინა უსაფრთხოა.
„აბსოლუტურად უსაფრთხოა ვაქცინა, რაც მთავარია, ვაქცინა გვიცავს სიკვდილისგან. ეს ხომ დადასტურდა. დავუჯეროთ მეცნიერებს და ფაქტებს. ავიცრათ და ამით დავიცვათ საზოგადოების თითოეული წევრი“, – განაცხადა ღარიბაშვილმა.
როგორც პრემიერმა აღნიშნა, ამ დროისათვის ქვეყანაში ვაქცინების საკმაო რაოდენობაა, ახლო მომავალში კი დამატებით Pfizer-ის ნახევარი მილიონი დოზა შემოვა.
ამ ეტაპზე საქართველოში ხელმისაწვდომია AstraZeneca-ს, Pfizer-ის, Sinopharm-ისა და Sinovac-ის ვაქცინები.
საქართველოში კორონავირუსის მეხუთე ტალღა საკმაოდ მაღალი ნიშნულით დაიწყო და ამიტომ ძალიან მნიშვნელოვანია რეკომენდაციების დაცვა: პირბადის ტარება, სოციალური დისტანციის დაცვა, უარის თქმა მასობრივ თავშეყრებზე და დროული ვაქცინაცია.
ეპიდემიოლოგების განცხადებით, პანდემიის დასაძლევად საჭიროა ქვეყნის ზრდასრული მოსახლეობის 70-80%-ის ვაქცინაცია.
22 ოქტომბრის მონაცემებით, სულ ჩატარებულია 1.938.274 აცრა. მინიმუმ ერთი დოზით ვაქცინირებულია 1.020.110 ადამიანი – ზრდასრული მოსახლეობის 35,9%. სრულად (ორჯერადად) ვაქცინირებულია 917.638 ადამიანი – ზრდასრული მოსახლეობის 32,1%. 21 ოქტომბერს აიცრა 5.309 ადამიანი.
ბოლო მონაცემებით, საქართველოში გასულ დღე-ღამეში კორონავირუსის 4.155 შემთხვევა გამოვლინდა და ინფიცირებულთა საერთო რიცხვმა 684.337-ს მიაღწია. გარდაიცვალა 40 ადამიანი.