თბილისი, 21 ოქტომბერი – Sputnik. საქართველოს პრემიერ-მინისტრმა ირაკლი ღარიბაშვილმა კოალიციური მთავრობის ფორმირებას ოპოზიციის მხრიდან თავის მოტყუება უწოდა.
გუშინ ოპოზიციური პარტია „ერთიანი ნაციონალური მოძრაობის“ თავმჯდომარემ, თბილისის მერობის კანდიდატმა ნიკა მელიამ წარმოადგინა გუნდი, რომელიც არჩევნების მეორე ტურში გამარჯვების შემთხვევაში თბილისის კოალიციურ მთავრობას ჩამოაყალიბებს.
„ეს არის საკუთარი თავის მოტყუება. ისინი თავის თავს აჯერებენ, ატყუებენ და ცდილობენ, რომ გარკვეული განცდა შექმნან, მათ შორის უცხოელების თვალშიც, რომ რაღაც კოალიციური მთავრობის ჩანასახი გააკეთეს თუ რაღაც მსგავსი. აქედან გამომდინარე, ვფიქრობ, ყველასთვის ყველაფერი ნათელი და ცხადია“, – განაცხადა ირაკლი ღარიბაშვილმა ჟურნალისტებთან.
ნიკა მელიას მიერ წარმოდგენილი ჩრდილოვანი მინისტრთა კაბინეტის შემადგენლობაში ვიცე-მერების პოსტებზე დასახელდნენ: მამუკა ხაზარაძე („ლელო საქართველოსთვის“), ზურაბ ჯაფარიძე („გირჩი - მეტი თავისუფლება“), ირაკლი აბესაძე („ევროპული საქართველო - მოძრაობა თავისუფლებისთვის“) და ელენე ხოშტარია („დროა“).
საქართველოში თვითმმართველობის არჩევნები 2 ოქტომბერს გაიმართა. პირველი ტურის შედეგებით, მმართველი პარტია „ქართული ოცნება“ და მისი მთავარი კონკურენტი, ოპოზიციური პარტია „ერთიანი ნაციონალური მოძრაობა“ ემზადებიან მეორე ტურისთვის, რომელიც 30 ოქტომბერს 20 მუნიციპალიტეტში უნდა გაიმართოს, მათ შორის თბილისში, სადაც ვერც ერთმა კანდიდატმა 50%-ზე მეტი ხმა ვერ მოიპოვა.