თბილისი, 14 ოქტომბერი – Sputnik. ქუთაისის მერობის კანდიდატმა, „ერთიანი ნაციონალური მოძრაობის“ ერთ-ერთმა ლიდერმა ხატია დეკანოიძემ პირობა დადო, რომ ადგილობრივი არჩევნების მეორე ტურში გამარჯვებას მოიპოვებს.
ეს განცხადება მან გააკეთა თბილისში, თავისუფლების მოედანზე, სადაც ამ წუთებში იმართება მრავალათასიანი აქცია ექს-პრეზიდენტ მიხეილ სააკაშვილის გათავისუფლების მოთხოვნით, რომელიც 1 ოქტომბერს თბილისში დააკავეს. იმ დღიდან ის რუსთავის ციხეში იმყოფება, სადაც უკვე მე-14 დღეა შიმშილობს.
ხატია დეკანოიძის თქმით, ესაა ნამდვილი თავგანწირვის მაგალითი.
„სააკაშვილის თავგანწირვაზე როცა საუბრობენ, ბევრი ამბობს, რატომ, რისთვის, რისი მოლოდინი ჰქონდა, მაგრამ ჩვენ ვიცით და ყველა ხვდება, ჩვენი ოპონენტიც, რომ ეს იყო თავგანწირვა და სამშობლოს სიყვარული. არ შეიძლება გამუდმებით ზიზღში და სიძულვილში ცხოვრება, არ შეიძლება გამუდმებით დაპირისპირება, ჩვენ დღეს გვჭირდება ერთიანობა ისე, როგორც არასდროს“, – განაცხადა დეკანოიძემ.
მან დაამატა, რომ ყველაფერს გააკეთებს მეორე ტურში გამარჯვებისთვის. არჩევნების მეორე ტური 30 ოქტომბერს გაიმართება. ხატია დეკანოიძე, რომელმაც ხმების 43,33% მიიღო, დაუპირისპირდება სამთავრობო კანდიდატს იოსებ ხახალეიშვილს, რომელმაც 41,45% აიღო.
„თავს დავდებ იმისთვის, რომ გამარჯვება ვიზეიმოთ მეორე ტურში. ყველაფერს გავაკეთებ, რომ ჩვენი საზოგადოება არათუ დაიხლიჩოს, არამედ უფრო გაერთიანდეს, იმისთვის, რომ პოლიტიკური განსხვავებების მიუხედავად, ერთი დიდი გადაკვეთის წერტილი გვქონდეს და ეს არის ჩვენი სამშობლო... გამარჯვება მეორე ტურში ჩვენი ყველას საზრუნავია. მე პირობას ვაძლევ საქართველოს თითოეულ მოქალაქეს, ჩემს მეგობარს, რომელიც საპყრობილეშია, რომ აუცილებლად ბოლომდე დიდი ბრძოლით მე მოვიპოვებ და ჩვენ მოვიპოვებთ ამ გამარჯვებას“, – განაცხადა დეკანოიძემ.
სააკაშვილის წინააღმდეგ, რომელიც სამშობლოში არალეგალურად სექტემბრის ბოლოს დაბრუნდა, საქართველოში რამდენიმე სისხლის სამართლის საქმეა აღძრული.
ექს-პრეზიდენტს დაუსწრებლად განაჩენი გამოტანილი აქვს ორ საქმეზე – სანდრო გირგვლიანის მკვლელობის საქმეზე დაპატიმრებულთა ამნისტიის და დეპუტატ ვალერი გელაშვილის ცემის ფაქტებზე. პირველ საქმეზე მას 3 წლით პატიმრობა, ხოლო მეორეზე - 6 წლით თავისუფლების აღკვეთა აქვს მისჯილი. გარდა ამისა, სააკაშვილი ბრალდებულია „ტელეიმედის", 7 ნოემბრის დარბევის, პატარკაციშვილების ქონების უკანონოდ დაუფლებისა და ბიუჯეტის თანხების გაფლანგვაში. აღნიშნულ საქმეებზე სასამართლო განხილვები მიმდინარეობს.
თავად სააკაშვილი საკუთარ თავს პოლიტპატიმარს უწოდებს.