თბილისი, 8 ოქტომბერი – Sputnik. ბათუმში ჩამონგრეული კორპუსის ნანგრევებიდან მაშველებმა კიდევ ერთი ადამიანი, ახალგაზრდა ქალი ამოიყვანეს.
ქალი ნანგრევების ქვეშ დაახლოებით ცხრა საათი იმყოფებოდა.
საგანგებო სიტუაციების მართვის სამსახურის თანამშრომლები ადგილზე სამძებრო-სამაშველო სამუშაოებს აგრძელებენ.
ბათუმში, 26 მაისის ქუჩაზე ხუთსართულიანი კორპუსის ერთი სადარბაზო შუადღისას ჩამოინგრა. სავარაუდოდ, ნანგრევებში 10-15 ადამიანია მოყოლილი. ნგრევის მიზეზად რამდენიმე ვერსია განიხილება.
ცოტა ხნის წინ კორპუსის ნანგრევებიდან მაშველებმა ერთი ადამიანი ამოიყვანეს. მანამდე კორპუსის ნანგრევებში მოყოლილი მანქანიდან მცირეწლოვანი ბავშვია ამოყვანილი, რომელიც კლინიკაში გადაიყვანეს.
ადგილობრივი მცხოვრებლების გაცხადებით, კორპუსში სარემონტო სამუშაოები მიმდინარეობდა, იყო ძლიერი ვიბრაცია, რამაც ისედაც ძველი და ამორტიზებული კორპუსი კიდევ უფრო დააზიანა. მათი თქმით, შენობაზე დამატებითი, მე-6 და მე-7 სართულებიც იყო დაშენებული, რაც ასევე სიმძიმეს ზრდიდა.
განიხილება გაზის აფეთქების ვერსიაც, თუმცა ერთ-ერთმა ადგილობრივმა ჟურნალისტებთან განცხადა, რომ შემთხვევამდე 15 წუთით ადრე კორპუსის მაცხოვრებლებს ბუნებრივი აირის გათიშვასთან დაკავშირებით აცნობეს.
ამ დროისათვის სამაშველო სამსახური ტერიტორიას წმენდს, სამუშაოები ძირითადად ხელით, მძიმე ტექნიკის მინიმალური გამოყენებით მიმდინარეობს.