თბილისი, 8 ოქტომბერი – Sputnik. ფონდმა „იალქანმა“ და ბათუმის მცხოვრებლებმა განაცხადეს, რომ მზად არიან საცხოვრებელი სახლის ჩამონგრევის შედეგად დაზარალებულებს დაეხმარონ.
ხუთსართულიანი კორპუსის ერთი სადარბაზო შუადღისას ჩამოინგრა. ნანგრევებში მოყოლილი ადამიანების ზუსტი რაოდენობა ამ დროისათვის ცნობილი არ არის. ბათუმის მერიის წინასწარი მონაცემებით, ჩამონგრეულ ნაწილში იმ მომენტისთვის დაახლოებით რვა ადამიანი იმყოფებოდა, მაგრამ კონტაქტზე მხოლოდ სამი გამოვიდა.
მომხდართან დაკავშირებით ფონდ „იალქნის“ თანამშრომლებმა დახმარების შესახებ განაცხადეს. ფონდმა ქალაქში რამდენიმე შტაბი გახსნა დასახმარებლად.
ფონდის შტაბები გახსნილია ჭავჭავაძის ქუჩაზე №32ა და №27-ში. იქ შესაძლებელია ცხელი საკვების მიღება, ფსიქოლოგისა და მედდების მხრიდან დახმარება. არის ტერიტორია, სადაც შეიძლება 10 ადამიანის მოთავსება, რეზერვშია ორი ბინა, სადაც შეიძლება დაშავებულების განთავსება, ნათქვამია ფონდის განცხადებაში.
ასევე გამოცხადდა „ცხელი ხაზის“ ნომერი, რომლის მეშვეობითაც შესაძლებელია დახმარების თხოვნა.
აუცილებელი ნივთების შეგროვებისკენ მოუწოდებენ სოციალურ ქსელებშიც.
„ხალხო, სადმე მოვაგროვოთ პირველადი ნივთები, ტანსაცმელი და საკვები ნანგრევებში გადარჩენილი მოქალაქეებისთვის“, – წერს Jeni Kvantaliani.
„მეგობრებო, დღევანდელი ჩამონგრევით დაზარალებულს თუ იცნობთ, ვისაც დასჭირდება ღამის გასათენებელი, გთხოვთ, მომწეროთ. შევიფარებთ რამდენიმე ადამიანს. საკვები, ტანსაცმელი, პირველადი ნივთები, გთხოვთ, ან მომწერეთ, ან დაზარალებულს მიეცით საკონტაქტო“, – დაწერა მელანო მახარაძემ.
ადამიანები დახმარებას ცდილობენ შემთხვევის ადგილზეც. ჩამონგრეული კორპუსის მცხოვრებლები მწრივში ჩადგნენ და ნამტვრევებს ერთმანეთს ხელით აწვდიან, მაშველებს ეხმარებიან იმ ადგილის ნანგრევებისგან გათავისუფლებაში, სადაც ტექნიკის მუშაობა არ შეიძლება.